ޓްރާންސްޕޯޓް މިނިސްޓަރު މުހައްމަދު އަމީންގެ އިތުބާރު ނެތްކަމަށް ބުނެ އިދިކޮޅު އެމްޑީޕީން ހުށަހެޅި މައްސަލަ، ސަރުކާރު ހިންގާ ޕީއެންސީގެ ސުޕަ މެޖޯރިޓީ އޮންނަ ރައްޔިތުންގެ މަޖިލީހުން މިއަދު ބޮޑު ތަފާތަކުން ފެއިލްކޮށްލައިފިއެވެ.

މިއަދު ބޭއްވި މަޖިލީހުގެ ޖަލްސާގައި ނެގުނު ވޯޓުގައި، އަމީންގެ އިތުބާރު ނެތްކަމުގެ މައްސަލަ ފާސްކުރުމަށް ވޯޓު ދެއްވީ އެންމެ 11 މެންބަރުންނެވެ. އެއީ ހުސް އެމްޑީޕީގެ މެމްބަރުންނެވެ.

Ad by Hajj Corporation

އެހެންނަމަވެސް، މި މައްސަލައާ ދެކޮޅަށް ޕީއެންސީގެ 54 މެންބަރުން ވޯޓު ދެއްވާފައިވެއެވެ. މިއީ އަމީނަށް ލިބުނު ބޮޑު ކާމިޔާބީއެކެވެ. އަދި ސަރުކާރާއެކު މެމްބަރުން ތިބިކަން ދައްކުވައިދިން އަލިގަދަ ހެއްކެކެވެ.

އިދިކޮޅު އެމްޑީޕީގެ 12 މެންބަރުންގެ ސޮޔާއެކު މި މައްސަލަ މަޖިލީހަށް ހުށަހަޅާފައިވަނީ މިދިޔަ އޭޕްރީލް މަހުގެ 29 ވަނަ ދުވަހުއެވެ. އެހެންނަމަވެސް، މިއަދުގެ ވޯޓުން ދައްކުވައިދެނީ މަޖިލީހުގެ ގިނަ މެންބަރުން އަމީންގެ މަސައްކަތާމެދު ހިތްހަމަޖެހޭކަމެވެ.

މި ނަތީޖާއަކީ ޓްރާންސްޕޯޓް ދާއިރާގައި އަމީން ކުރައްވަމުން ގެންދަވާ މަސައްކަތްތަކަށް މަޖިލީހުގެ މެންބަރުން ދެއްވި ބޮޑު ތާއީދެކެވެ.