މާލޭގެ އިމާރާތެއްގެ މަތިން ހައްވާ ޔުމްނު ރަޝީދު ވެއްޓުނު މައްސަލާގައި ބައިވެރިވުން އޮވެދާނެ ކަމަށް ތުހުމަތުކޮށް ހައްޔަރުކޮށްފައިވާ ގ. އެރިޔަދޫ، ރައުދު އަހްމަދު ޒިލާލް (21) ގެ ބަންދަށް ކްރިމިނަލް ކޯޓުން އިތުރު 20 ދުވަސް ޖަހައިފިއެވެ.

މިދިޔަ މަހުގެ 18 ވަނަ ދުވަހުގެ ރޭ ހިނގި މި ހާދިސާގައި، ހ. ފެންޓެނޯއީގެއިން ހ. މިޓާޒްގޭގެ ފުރާޅު މައްޗަށް ޔުމްނު ވެއްޓުނު މައްސަލާގައި ރައުދު ހައްޔަރުކޮށްފައިވަނީ ހާދިސާ ހިނގިތާ ހަ ދުވަސް ފަހުން، އޭޕްރީލް 24 ގައެވެ.

Ad by Hajj Corporation

އެނގިފައިވާ ގޮތުގައި ރަޢުދުގެ ބަންދު އިތުރުކޮށްފައިވަނީ މި މައްސަލައިގައި އޭނާގެ މައްޗަށް ތުޙުމަތު ކުރެވޭ ގިނަ ކަންތައްތަކެއް ހުރުމުންނެވެ. ނަމަވެސް ރަޢުދުގެ ފަރާތުން ބަންދު މަޖިލީހުގައި ބުނެފައިވަނީ ހާދިޘާ ހިނގީރޭ ކަންތައް ހިނގާދިޔަ ގޮތް މިހާރު ހަނދާނުގައި ނެތް ކަމަށާއި އެ ވާހަކަތައް ކިޔައިދޭން މިހާރު ނޭނގޭ ކަމަށެވެ.

ރަޢުދުގެ ފަރާތުން މިފަދައިން ފާހަގަކޮށްފައިވީ ނަމަވެސް މި މައްސަލައިގައި ފުލުހުން ހޯދާފައިވާ ހެކި ޤަރީނާއަށް ބަލާއިރު، މި މައްސަލައިގެ ތުޙުމަތު ރަޢުދުގެ މައްޗަށް އޮތް ކަމަށް ބާރު ލިބޭ ހެކިތަކެއް އެބަ ހުރިކަމަށް މައުލޫމާތު ލިބެއެވެ.

ފުލުހުން ވަނީ އޭނާގެ މައްޗަށް ހާދިސާގައި ބައިވެރިވުމުގެ އިތުރުން، މަސްތުވެފައި ހުރުމާއި ޖިންސީ ބޭނުންހިފުމުގެ ކުށަށް އަރައިގަތުމުގެ ތުހުމަތު ކޮށްފައެވެ. މި މައްސަލައިގައި ފުލުހުންގެ އިހުމާލު އޮތް ކަމަށް އާންމުން ތުހުމަތުކުރަމުން ދިޔުމާ ގުޅިގެން، ރައީސް ޑރ. މުހައްމަދު މުއިއްޒު ވަނީ މައްސަލަ ތަހުގީގުކުރުމަށް ރިޔާސީ ކޮމިޝަނެއް އުފައްދަވާފައެވެ.

މިވަގުތު ޔުމްނުއަށް މެލޭޝިއާގައި އިތުރު ފަރުވާދެމުންދާއިރު ޔުމްނު ވަނީ މައްސަލައާއި ގުޅޭ ބައެއް ވާހަކަތައް ހިއްސާކޮށްފައެވެ. ޔުމްނުގެ އާއިލާއިން ބުނި ގޮތުގައި ޔުމްނު އަމިއްލައަށް ފުންމާލީ ނޫން ކަމަށާއި ބަޔަކު އޭނާ ވައްޓާލީކަމަށް ޔުމްނު ވަނީ ބުނެފައެވެ.