ބޮޑުތަކުރުފާނު މަގު ހެދުމަށް އާންމުންގެ ޚިޔާލު ހޯދުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީއިން ހުޅުވާލައިފިއެވެ.

މާލޭ ބޭރުމަގު، ބޮޑުތަކުރުފާނު މަގުގެ މަސައްކަތް ކުރުމަށް ހަދަންޖެހޭ އެންވަރަމަންޓަލް އިމްޕެކްޓް އެސެސްމަންޓް ހެދުމުގެ މަސައްކަތް މިހާރު އެމްޓީސީސީން ދަނީ ކުރަމުންނެވެ. އީއައިއޭގެ މަސައްކަތްކުރުމަށްޓަކައި އެ މަޝްރޫޢުގެ ސަބަބުން އާންމުންނަށް ކުރިމަތިވެދާނެ ދަތިތަކާއި، އަދި މަޝްރޫޢުގައި ހުރި އާންމުން ކަންބޮޑުވާ ކަންކަން ބެލުމަށް މިހާރުވަނީ ހުޅުވާލާފައެވެ.

Ad by Hajj Corporation

ބޮޑުތަކުރުފާނު މަގުގެ އުތުރުން، ހުޅުމާލޭ ފެރީ ޓަރމިނަލްއިން ފެށިގެން މަސްމާރުކެޓާއި ހަމައަށް 830 މީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށް ސަރުކާރުންވަނީ ނިންމަވާފައެވެ. މިމަގު ތަރައްޤީކުރަނީ މަގުފުޅާކޮށް، ކޮޅަކަށް 2 ލޭނު ހިމެނޭހެން އެންމެ ޒަމާނީ ފެންވަރަށްކަމަށް ސަރުކާރުންވަނީ ބުނެފައެވެ. މިގޮތުން މަގުފުޅާކުރުމަށް އެސަރަޙައްދުގެ ބޭރު ތޮށި، ބޭރަށް ޖެއްސުމުގެ މަސައްކަތް ކުރުމަށް ވެސް ވަނީ ހަމަޖެހިފައެވެ.

މި މަޝްރޫޢުގެ ދަށުން އެސަރަޙައްދުގައި ދުވާރުތައް ހެދުމާއި، ފެން ހިންދާ ނިޒާމް ޤާއިމްކުރުމުގެ އިތުރަށް މަގުމަތީގައި ކުރަންޖެހޭ ނިޝާންތަކާއި ހަރުކުރަންޖެހޭ ނިޝާންތައް ހަރުކުރުމުގެ މަސައްކަތްވެސް ކުރުމަށްވަނީ ހަމަޖެހިފައެވެ.

ބޮޑުތަކުރުފާނު މަގު ހެދުމަށް އެމްޓީސީސީއާއި ހަވާލުކޮށްފައިވަނީ އޭޕްރީލް މަހުގެ 9 ވަނަ ދުވަހުގައެވެ. މިމަސައްކަތް އެމްޓީސީސީއާއި ހަވާލުކޮށްފައިވަނީ 1 އަހަރާއި 3 މަސްތެރޭގައި މަސައްކަތް ނިންމާގޮތަށެވެ. މިމަސައްކަތް އެކުންފުންޏާއި ހަވާލުކޮށްފައިވަނީ 144.5 މިލިއަން ރުފިޔާއަށެވެ.