މ. މުލީ އެއާޕޯޓު ރަސްމީކޮށް ހުޅުވައިފިއެވެ.

މި އެއާޕޯޓު ރަސްމީކޮށް ހުޅުއްވައިދެއްވީ މިއަދު އެ އެއާޕޯޓުގައި ބޭއްވި ރަސްމިއްޔާތުގައި، ރައީސުލްޖުމްހޫރިޔާ ޑރ. މުޙައްމަދު މުޢިއްޒުއެވެ.

Ad by Hajj Corporation

މި އެއާޕޯޓު މިއަދު ރަސްމީކޮށް ހުޅުވި ނަމަވެސް، މިމަހުގެ 17 ވަނަ ދުވަހު މި އެއާޕޯޓަށް ކޮމާޝަލް ދަތުރުތައް ވަނީ ފަށާފައެވެ.

މި އެއާޕޯޓް ރަސްމީކޮށް ހުޅުވުމަށް ކުރިން ނިންމާފައިއޮތީ މި ހިނގާ މެއި މަހުގެ 1 ވަނަ ދުވަހުއެވެ. ނަމަވެސް އެއަރޕޯޓް ހުޅުވުން ލަސްކުރީ، ކޮމާޝަލް ދަތުރުތަކާއެކު އެއަޕޯޓް ރަސްމީކޮށް ހުޅުވުމަށްކަމަށް މި އެއާޕޯޓް ބަލަހައްޓާ ރީޖަނަލް އެއާޕޯޓްސް ކުންފުނީގެ މެނޭޖިން ޑިރެކްޓަރ އަޙުމަދު މުބީން މީގެ ކުރިން ވިދާޅުވެފައިވެއެވެ.

އޭގެ ފަހުން އެ އެއާޕޯޓަށް ކޮމާޝަލް ދަތުރުތައް ފެށުމަށް ރީޖަނަލް އެއާޕޯޓްސް ކުންފުނީގެ ފަރާތުން މިދިޔަ މަހުގެ 15 ވަނަ ދުވަހު ވަނީ ރާއްޖޭގެ އެއާލައިން އޮޕަރޭޓަރުންނާ ބައްދަލުކޮށް މައުލޫމާތު ހިއްސާކޮށްފައެވެ.

2021 ވަނަ އަހަރު ތަރައްޤީކުރަން ފެށި މުލި އެއާޕޯޓުގެ މަސައްކަތްތައް ނިންމާލައި، އެއާޕޯޓުގެ ޓެސްޓް ފްލައިޓް ވެސް ވަނީ ހުސްވި އޭޕްރިލް މަހުގެ 25 ވަނަ ދުވަހު ޖައްސާފައެވެ. ޖުމްލަ 221 މިލިއަން ރުފިޔާ ޚަރުކުރި މި މަޝްރޫއުގެ ދަށުން 1،200 މީޓަރު ދިގު، 30 މީޓަރު ފުޅާ ރަންވޭއެއް ވަނީ ޤާއިމްކޮށްފައެވެ.