2025 ވަނަ އަހަރުގެ އެޕްރީލް މަހު އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ހެލްޕްލައިންއަށް ޖުމްލަ 2150 ކޯލު ލިބިފައިވާކަމަށް އެ ވުޒާރާއިން ބުނެފިއެވެ.

ވުޒާރާގެ ތަފާސްހިސާބުތަކުން ދައްކާގޮތުން ވުޒާރާގެ ޗައިލް ހެލްޕްލައިން ސާދަ ބާރަ އަށް ޖުމްލަ 1778 މައްސަލަ ހުށަހެޅިފައިވެއެވެ. މީގެ ތެރެއިން، 66 ކޯލަކީ ކުޑަކުދިން އަމިއްލަ އަށް ހުށަހަޅާފައިވާ މައްސަލަތަކެވެ. އަދި، މީގެތެރެއިން 1198 މައްސަލަ ބޮޑެތިމީހުން ހުށަހަޅާފައިވާއިރު، ކާކުކަން ނޭނގޭ ގޮތަށް 514 މައްސަލަ ވަނީ ހުށަހަޅާފައެވެ.

ހަމައެހެންމެ، މި ވުޒާރާގެ ސޯޝަލް ސަރވިސް ހެލްޕްލައިން 1421 އަށް ޖުމްލަ 280 މައްސަލަ ވަނީ ހުށަހަޅާފައެވެ.

މީގެ އިތުރުން، މި އަހަރު އެޕްރީލް މަހު އަމިއްލަ ނަފްސަށް ގެއްލުން ދިނުމާއި އަމިއްލައަށް މަރުވާން އުޅުމާއި ގުޅޭ 35 މައްސަލައެއް މިވުޒާރާއަށް ވަނީ ރިޕޯޓުކޮށްފައެވެ. އޭގެ ތެރޭގައި، އަންހެނުންނާއި ގުޅޭ 26 މައްސަލައަކާއި ފިރިހެނުންނާއި ގުޅޭ 09 މައްސަލައެއް ހިމެނެއެވެ.

1412 ފޯނު ނަންބަރަކީ ޖިންސީ އަދި ޖިސްމާނީ އަނިޔާ ލިބޭ ކުދިން އަމިއްލައަށް އެ މައްސަލަތައް ކަމާ ބެހޭ ފަރާތްތަކަށް ހުށަހެޅުމަށް 2009 ވަނަ އަހަރު ލޯންޗްކުރި 24 ގަޑިއިރުގެ ހިދުމަތްދޭ ހެލްޕްލައިން އެކެވެ.