މި އަހަރުގެ މެއި މަހުގެ ނިޔަލަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް ގެވެށި އަނިޔާގެ ޖުމްލަ 33 މައްސަލަ ހުށަހަޅައިފައިވާ ކަމަށް އެ ވުޒާރާއިން ބުނެފިއެވެ.

އެ ވުޒާރާގެ ތަފާސް ހިސާބު ދައްކާގޮތުން، މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ޖިސްމާނީ ގޮތުން ކުރާ އަނިޔާގެ މައްސަލަތަކެވެ. އެގޮތުން މި ބާވަތުގެ 17 މައްސަލައެއްވަނީ ރިޕޯޓުކޮށްފަވާ ކަމަށް އެ އިދާރާއިން ވަނީ ބުނެފައެވެ.

Ad by Hajj Corporation

ތަފާސް ހިސާބު ދައްކާ ގޮތުން މައްސަލައިގެ ތެރޭގައި ހިމެނެނީ ފިރިހެނުންނާއި ގުޅޭ 01 މައްސަލައަކާއި އަންހެނުންނާއި ގުޅޭ 16 މައްސަލައެކެވެ. އަންހެނުންނާއި ފިރިހެނުންނަށް ކުރާ އަނިޔާގެ ތެރޭގައ،ި ނަފްސާނީ އަނިޔާކުރުމާއި، އަނގަބަހުން ކުރެވޭ އަނިޔާގެ 12 މައްސަލައެއް ވެސް ހިމެނޭ ކަމަށް ތަފާސް ހިސާބުން ދައްކައެވެ.

އަދި ޖިންސީ ހާނިކަކުރުމުގެ 01 މައްސަލައާއި، ޖިންސީ ފުރައްސާރަ ކުރުމުގެ 01 މައްސަލައާއި، މާލީ އަދި އިޤުތިޞާދީ ފުދުންތެރިކަން ފޯރުކޮށްދިނުމުގައި ހުރަސްއެޅުމުގެ 01 މައްސަލައިގެ އިތުރުން، ބިރުދެއްކުމުގެ ގޮތުން ކުރެވޭ ކަންކަމާއި ގުޅޭ 01 މައްސަލަ ވަނީ މިއަހަރު މެއި މަހު އެ ވުޒާރާއަށް ރިޕޯޓުކޮށްފަ ވާކަމަށް ވުޒާރާއިން މައުލޫމާތުދެއެވެ.

އަންހެނުންނާއި ފިރިހެނުންނަށް ކުރާ އަނިޔާގެ މައްސަލަތަކުގެ ތެރޭގައި ހިމެނެނީ އަންހެނުންނާއި ގުޅޭ 27 މައްސަލައަކާއި ފިރިހެނުންނާއި ގުޅޭ 06 މައްސަލައެކެވެ.