ޤައުމީ އެއަރލައިން މޯލްޑިވިއަންއިން މުލީ އެއަރޕޯޓަށް ޝެޑިއުލް ދަތުރުތައް ފަށައިފިއެވެ

މޯލްޑިވިއަންއިން މުލީ އެއަރޕޯޓަށް ޝެޑިއުލް ދަތުރުތައް ފަށާފައިވާ އިރު މި ޚިދުމަތް ފުރަތަމަ ފަށާއިރު، ކޮންމެ ހަފްތާއެއްގެ ހޮނިހިރު ދުވަހު މުއްޔަށް ދަތުރުތައް ކުރުމަށް ވަނީ ހަމަޖެހިފައެވެ.

Ad by Hajj Corporation

އިއްޔެ ފުރަތަމަ ދަތުރު މާލެއިން ފުރީ މެންދުރުފަހު 3:30 ގައެވެ. އަދި މުލިން މާލެއަށް އެނބުރި ދަތުރުކުރީ ހަވީރު 4:45 ގައެވެ.

ދަތުރުތަކަށް އޮންނަ ޑިމާންޑަށް ބަލައި، ކުރިއަށް އޮތް ތަނުގައި ޝެޑިއުލް ދަތުރުތައް އިތުރުކުރުމަށް ވަނީ ރޭވިފައެވެ. މީގެ އިތުރުން، އެހެން އެއަރލައިންތަކަށްވެސް މުލީ އެއަރޕޯޓަށް ދަށް ދަތުރުތައް ކުރުމުގެ ފުރުސަތު ރީޖަނަލް އެއަރޕޯޓްސްއިން ވަނީ ހުޅުވާލާފައެވެ. މުލީ އެއަރޕޯޓަށް ދަތުރުކުރުމަށް ހުޅުވާލި ފުރުޞަތުގައި މިހާތަނަށް ޝަޢުގުވެރިކަން ފާޅުކުރީ މޯލްޑިވިއަންއިން އެކަނިކަމަށް ރީޖަނަލް އެއަރޕޯޓްސްއިން ވަނީ ބުނެފައެވެ.

މުލީ އެއަރޕޯޓަކީ ރާއްޖޭގެ އެތެރޭގެ ދަތުރުތަކަށް ޚާއްސަކުރެވިފައިވާ އެއަރޕޯޓެކެވެ. މި އެއަރޕޯޓު ހެދުމަށްޓަކައި 36 ހެކްޓަރުގެ ބިން ހިއްކާ، 1500 މީޓަރުގެ ރަންވޭއެއް ވަނީ ހަދާފައެވެ. އެންމެ ޒަމާނީ ވަސީލަތްތަކާއެކު މި އެއަރޕޯޓު ތަރައްޤީކުރުމަށް ސަރުކާރުން 300 މިލިއަނަށްވުރެ ގިނަ ރުފިޔާ ޚަރަދުކޮށްފައިވެއެވެ.

މުލީ އެއަރޕޯޓުގައި 40 އެއްހާ މުވައްޒަފުން މަސައްކަތްކުރާނެ ކަމަށް ލަފާކުރެވެއެވެ. މި އެއަރޕޯޓުގެ ޓެސްޓް ފްލައިޓް ބޭއްވުނީ މިދިޔަ އޭޕްރީލް މަހުގެ 25 ވަނަ ދުވަހުއެވެ. ރައީސުލް ޖުމްހޫރިއްޔާ ޑރ. މޫހައްމަދު މުއިއްޒު، މުލީ އެރަޕޯޓް ރަސްމީކޮށް ކުޅުވައިދެއްވީ ، މިމަހުގެ 20 ގައެވެ.