ކެލާ ދާއިރާގެ ތިން ރަށަށް ޚާއްޞަކޮށްގެން ބާއްވާ "އެމްޕީ ޝަރީ ކަޕް 2025" މިރޭ ރަސްމީކޮށް އިފްތިތާޙުކޮށްފިއެވެ. މުބާރާތުގެ ޚާއްޞަ ލޯގޯ އިފްތިތާޙުކޮށްދެއްވީ މި ޙަފްލާގެ ޝަރަފުވެރި މެހެމާނު، ރައީސް އޮފީހުގެ އޮނަރަބަލް މިނިސްޓަރ އަލްފާޟިލް ޢަލީ ޢާރިފެވެ.

މިނިސްޓަރ ޢަލީ ޢާރިފް ދެއްކެވި ވާހަކަފުޅުގައި، މި ސަރުކާރުން ދުންފަތާ ދެކޮޅަށް ގެންގުޅުއްވާ ވިސްނުންފުޅާއި ކުޅިވަރާއި ޒުވާނުންނާ ގުޅުންހުރި ސިޔާސަތުގެ މައްޗަށް އަލިއަޅުވާލެއްވިއެވެ. މުބާރާތުގެ ރަސްމީ ލަވަ ނެރެދެއްވަމުން ކެލާ ދާއިރާގެ އިއްޒަތްތެރި މެންބަރު ޢަބްދުﷲ ޝަރީފް ވިދާޅުވީ، މި މުބާރާތް ބޭއްވުމުގެ މައިގަނޑު މަޤްޞަދަކީ ދުންފަތާ ދުރު، ދުޅަހެޔޮ ޒުވާން ޖީލެއް ބިނާކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، ތިން ރަށުގެ ޒުވާނުންނަށް ވާދަވެރި ކުޅިވަރު މުބާރާތްތަކެއް ބާއްވައިދީ، ކުޅިވަރުގެ ހުނަރުވެރިކަން ތަރައްޤީކޮށްދިނުން ކަމަށެވެ.

Ad by Hajj Corporation

މި މުބާރާތުގެ ޗެމްޕިއަން ޓީމަށް 50,000 ރުފިޔާގެ ފައިސާގެ އިނާމެއް ކަނޑައަޅާފައިވާއިރު، މުބާރާތް ބޭއްވުމަށް ހަމަޖެހިފައިވަނީ އަންނަ ޖުލައި މަހުގެ 26 ވަނަ ދުވަހު ހއ. ފިއްލަދޫގައެވެ. މުބާރާތުގައި ހިމެނޭ ހޭންޑްބޯލް މެޗުތައް ކޮންމެ ދުވަހެއްގެ ހަވީރު ކުޅުމަށް ހަމަޖެހިފައިވާއިރު، ފުޓްސަލް މެޗުތައް ރޭގަނޑު ކުޅުމަށް ވަނީ ހަމަޖެހިފައެވެ.

މުބާރާތުގެ މެއިން ސްޕޮންސަރގެ ގޮތުގައި ސިންގަރ ކުންފުނި ހަމަޖެހިފައިވާއިރު، މީޑިއާ ޕާޓްނަރގެ ގޮތުގައި އެމްއެމް ޓީވީއާއެކު ވަނީ އެއްބަސްވުމުގައި ސޮއިކުރެވިފައެވެ. އިފްތިތާޙީ ޙަފްލާގައި ރައީސް އޮފީހުގެ މިނިސްޓަރުންގެ އިތުރުން، ސްޕޯޓްސް މިނިސްޓްރީގެ އިސްވެރިންނާއި، ކެލާ ދާއިރާގެ ޒުވާނުންނާއި، ކުޅިވަރު ޢާއިލާގެ ގިނަ ފަރާތްތަކެއް ބައިވެރިވިއެވެ.