ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިބްރާހީމްގެ ނިންމެވުމާ އެއްގޮތަށް، މިއަހަރުން ފެށިގެން ދިވެހި ހައްޖުވެރިން މައްކާއިން މަދީނާއަށް ކުރާ ދަތުރުތައް ކުރާނީ ހައިސްޕީޑް ޓްރެއިންގައި ކަމަށް ހައްޖު ކޯޕަރޭޝަނުގެ މެނޭޖިން ޑިރެކްޓަރު މުޙައްމަދު ޝަކީލް މިއަދު ވިދާޅުވެއްޖެއެވެ.

ޝަކީލް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މީގެ ކުރިން 8-10 ގަޑިއިރު ހޭދަވަމުން އައި މި ދަތުރު، ހައިސްޕީޑް ޓްރެއިންގެ ސަބަބުން 2 ގަޑިއިރަށް ކުރުވެގެންދާނެ ކަމަށެވެ. މިއީ ހައްޖުގެ އަޅުކަން އަދާކުރުމަށްފަހު ހައްޖުވެރިންނަށް ލިބޭނެ ވަރަށް ބޮޑު ލުޔެއް ކަމަށްވެސް އޭނާ ފާހަގަކުރެއްވިއެވެ.

"ހައްޖުގެ އަޅުކަމަށް ސައުދީ އަރަބިއްޔާއަށް ދާ ދިވެހި ހައްޖުވެރިން މީގެ ކުރިން 8-10 ގަޑިއިރުން ބަހުގައި މައްކާއިން މަދީނާއަށް ކުރަމުން އައި ދަތުރު ހައިސްޕީޑް ޓްރެއިންގައި ކުރުމަށް ރައީސުލްޖުމްހޫރިއްޔާ ޑރ. މުޢިއްޒު ނިންމަވާފައިވާތީ މި އަހަރުން ފެށިގެން ހައްޖުވެރިން މައްކާއިން މަދީނާއަށް ކުރާ ދަތުރުތައް ކުރާނީ ހައިސްޕީޑް ޓްރެއިންގައި،" ޝަކީލް ވިދާޅުވިއެވެ.

މި ބަދަލާއެކު، ހައްޖުވެރިންގެ ދަތުރު ފަސޭހަވެ، އަވަސްވެގެންދާނެއެވެ. އަދި މިއީ ހައްޖުވެރިންނަށް ލިބޭ ވަރަށް ބޮޑު ލުކެވެ.

މިއަހަރުގެ ހައްޖުގެ އަޅުކަން އަދާކުރުމަށް ރާއްޖެއިން ދިޔަ ފުރަތަމަ ގްރޫޕް މިހާރު ވަނީ ސައުދީ އަރަބިއްޔާއަށް ގޮސްފައެވެ. އެ ގްރޫޕަށް ސައޫދީ ސަރުކާރުން ވަނީ ހޫނު މަރުހަބާއެއް ކިޔާފައެވެ.

ރާއްޖެއިން ޙައްޖަށް ދިޔުމަށް ފުރާ ދެވަނަ ފްލައިޓު ފުރުމަށް ހަމަޖެހިފައިވަނީ މާދަމާއެވެ. ތިންވަނަ ފްލައިޓު ފުރުމަށް ހަމަޖެހިފައިވަނީ މިމަހުގެ 29 ވާ ބުރާސްފަތި ދުވަހުއެވެ. އަދި ފަހު ފްލައިޓު ފުރުމަށް ހަމަޖެހިފައިވަނީ 30 ވަނަ ދުވަހުއެވެ.