މިވީ 30 ވަރަކަށް އަހަރުގެ ތެރޭގައި އައިޖީއެމްއެޗާއި ދަރުމަވަންތަ ހޮސްޕިޓަލަށް އިތުރުކުރެވުނީ 130 އެނދުކަމަށާއި، ނަމަވެސް ފާއިތުވި ދޮޅު އަހަރު ތެރޭގައި އެ ހޮސްޕިޓަލަށް 194 އެނދު އިތުރުކުރެވިފައިވާކަމަށް މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤު ޙަލީމް ވިދާޅުވެއްޖެއެވެ.

އިބްރާހިމް އަބްދުއްރައްޒާޤު ޙަލީމް މިހެން ވިދާޅުވީ އައިޖީއެމްއެޗްގައި ޤާއިމްކޮށްފައިވާ މަލްޓި- ސްޕެޝަލިޓީ ސަރޖިކަލްް ވިންގް ހުޅުވުމުގެ ރަސްމިއްޔާތުގައި ވާހަކަދައްކަަމުންނެވެ.

މާލޭ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤު ޙަލީމް ވިދާޅުވީ ފާއިތުވި ދޮޅު އަހަރެއްހާ ދުވަހުގެ ތެރޭގައި އައިޖީއެމްއެޗްއާއި ދަރުމަވަންތަ ހޮސްޕިޓަލުން ގިނަ ކަންކަން ހާސިލްކޮށްފައިވާކަމަށެވެ. އެގޮތުން ކުޑަކުދިންނަށް ޚާއްސަ އީއާރުއެއް ޤާއިމްކޮށްފައިވާކަމަށާއި ދަރުމަވަންތައް ހޮސޕްިޓަލްގައި ފާޓިލިޓީ ސެންޓަރެއް ޤާއިމްކޮށް އައިވީއެފް ހެދުމުގެ ޚިދުމަތް ދެމުންދާކަމަށް އޭނާ ވިދާޅުވިއެވެ.

އަދި އައިޖީއެމްއެޗްގައި އޮޕަރޭޝަން ތިއޭޓަރ ކޮމްޕްލެކްސް ޚިދުމަތައް ގެނެސްފައިވާކަމަށާއި ދަރުމަވަންތަ ހޮސްޕިޓަލްގެ ކެތްލެބްވެސް ޚިދުމަތަށް ގެނެސްފައިވާކަމަށްވެސް އޭނާ ވިދާޅުވިއެވެ

Ad by Hajj Corporation

އަބްދުއްރައްޒާޤު ޙަލީމް ވިދާޅުވީ މިދިޔަ އަހަރު އެކަނިވެސް ދަރުމަވަންތަ ހޮސްޕިޓަލާއި އައިޖީއެމްއެޗްއަށް 119 އެނދު އިތުރު ކުރެވުނުކަމަށެވެ. އަދި މިއަދު އިތުރުކުރި 75 އެނދާއެކު އެ ހޮސްޕިޓަލުގައި ބޭނުންކުރާ އެނދުގެ އަދަދު 510 އަށް އިތުރުވެފައިވާކަމަށް ސީއީއޯ އިބްރާހިމް އަބްދުއްރައްޒަޤު ޙަލީމް ވިދާޅުވިއެވެ.

ހޮސްޕިޓަލްތަކަށް ގެންނަ އުމްރާނީ ތަރައްޤީގެ އިތުރުން އިންސާނީ ވަޞީލަތް ތަރައްޤީކުރުމަށްވެސް މަސައްކަތް ކުރަމުންދާކަން އޭނާ ފާހަގަކުރެއްވިއެވެ. އެގޮތުން މިވީ ދޮޅު އަހަރުދުވަހުގެ ތެރޭގައި 411 މުވައްޒަފުން ރެކްރޫޓް ކުރަން ހުއްދަ ލިބިފައިވާކަމަށާއި މީގެ ތެރެއިން ބޮޑުބައެއް މިހާރު ރެކްރޫޓްކޮށްފައިވަކަމަށްވެސް އަބްދުއްރައްޒާޤު ޙަލީމް ވިދާޅުވިއެވެ.