ނައިޖީރިޔާގައި ފެންބޮޑުވެ 151 މީހެއްގެ ފުރާނަ ގެއްލި، 3000 މީހުންގެ ގެދޮރު ގެއްލިއްޖެއެވެ.

ނިޖަރު ސްޓޭޓް އިމަޖެންސީ މެނޭޖްމަންޓް އެޖެންސީ (އެންއެސްއީއެމްއޭ)ގެ ތަރުޖަމާނު، އިބްރާހީމް ހުސައިނީ ވިދާޅުވީ، މި އެންމެ ފަހުގެ ތަފާސްހިސާބުތައް ހާމަކުރީ ބުދަ ދުވަހުގެ ރޭން ފަށައިގެން ބުރާސްފަތި ދުވަހާ ހަމައަށް ދެމިގެންދިޔަ ބާރުގަދަ ވިއްސާރައަށް ފަހު ކަމަށެވެ.

މި ހާދިސާއާ ގުޅިގެން، ނޭޝަނަލް އިމަޖެންސީ މެނޭޖްމަންޓް އެޖެންސީ (ނީމާ) އިން ވަނީ ހުކުރު ދުވަހު ނިޖަރު ސްޓޭޓްގައި ކަމާބެހޭ ފަރާތްތަކާ ބައްދަލުކޮށް، މިފަދަ ކާރިސާތަކަށް އަވަހަށް ތައްޔާރުވުމާއި ގެއްލުން ކުޑަކުރުމުގެ މަސައްކަތްތަކާ ގުޅޭގޮތުން މަޝްވަރާކޮށްފައެވެ.

މި ބައްދަލުވުމުގައި ކާރިސާތަކާ ގުޅޭ ކަންކަން ބަލަހައްޓާ އޮފިޝަލުންނާއި ބައިވެރިން ވަނީ ތަކުރާރުވާ ފެންބޮޑުވުންތަކަށް ދާއިމީ ހައްލުތަކެއް ހޯދުމާ މެދު ވާހަކަ ދައްކާފައެވެ.

މި ވިއްސާރައިގެ ސަބަބުން ވަނީ ބޮޑެތި ގެއްލުންތަކެއް ލިބި، ގެތަކާއި، މަގުތަކާއި ދެ ފާލަން ހިމެނޭ ގޮތަށް އުމްރާނީ ވަސީލަތްތައް ހަލާކުވެގެން ގޮސްފައެވެ.