ރެއާލް މެޑްރިޑްގެ މިޑްފީލްޑަރ ޖޫޑް ބެލިންގްހަމްގެ ކޮއްކޮ ޖޯބް ބެލިންގްހަމް ބްރޫޝިއާ ޑޯޓްމަންޑް އަށް ބަދަލުވާން ނިންމައިފިއެވެ.

19 އަހަރުގެ ހުނަރުވެރި ކުޅުންތެރިޔާ ޖޯބް ބެލިންގްހަމް ޖަރުމަނުގެ ޑޯޓްމަންޑަށް ބަދަލުވާން ނިންމާފައިވާކަން ފަބްރީޒިއޯ ރޮމާނޯ ވެސް ވަނީ ކަށަވަރުކޮށްދީފައެވެ. މި ޓްރާންސްފަރ ގެ އަގަކީ 33 މިލިއަން ޔޫރޯއެވެ.

Ad by Hajj Corporation

މި އެއްބަސްވުމުގައި އިތުރު 5 މިލިއަން ޔޫރޯގެ އެޑް-އޮންތަކާއި، 15 ޕަސެންޓްގެ ސެލް-އޮން ކްލޯޒްއެއް ހިމެނެއެވެ. ދެ ކްލަބުން އަދި ރަސްމީކޮށް އިއުލާނު ނުކުރި ނަމަވެސް، މި ޑީލް ވަނީ ނިމުމަކާ ހަމައަށް އައިސްފައެވެ.

ޖޯބް ބެލިންގްހަމްގެ ސޮއި ހޯދުމަށް އާރްބީ ލައިޕްޒިގް އަދި އިނގިރޭސި ވިލާތުގެ އެކި ކްލަބްތަކުން ފުރުސަތު ހުޅުވާލާފައި ވީނަމަވެސް، އޭނާ ވަނީ އޭނާގެ ބޭބެ މީގެ ދެއަހަރުކުރިން ކުޅުނު ކުލަބުކަމަށްވާ ޑޯރޓްމަންޑް އާއި ގުޅުމަށް އެއްބަސްވެފައެވެ.

ޖޯބް ވަނީ މިދިޔަ ސީޒަނުގެ އިނގިރޭސި ދެވަނަ ޑިވިޝަނުގެ ސަންޑަރލޭންޑް އަށް ކުޅެ، ޗެންޕިއަންޝިޕްގެ އެންމެ މޮޅު ޒުވާން ކުޅުންތެރިޔާގެ މަޤާމް ހޯދާފައެވެ. އަދި އޭނާ ވަނީ ސަންޑަރލޭންޑް އަނބުރާ ޕްރީމިއަރ ލީގަށް ގެނައުމުގައި މުހިންމު ދައުރެއް އަދާކޮށްދީފައެވެ.