16 އަހަރުން ދަށުގެ އޭޝިއާ ކަޕް ސާބާ ކޮލިފަޔާސް މިއަދު މާލޭގައި ފެށުމަށް ތައްޔާރުވެއްޖެއެވެ. މިއީ މި މުބާރާތް ރާއްޖޭގައި ބޭއްވޭ ފުރަތަމަ ފަހަރެވެ. މި މުބާރާތް ކުރިއަށް އޮތް ތިންދުވަހުގައި މާލޭގެ ސޯޝަލް ސެންޓަރުގައި ކުރިޔަށްދާނެއެވެ.

މި ސަރަހައްދީ ކޮލިފައިންގ މުބާރާތުގައި ރާއްޖެ، ސްރީލަންކާ، އިންޑިއާ އަދި ބަންގްލަދޭޝް ވާދަކުރާއިރު، ރާއްޖެއިން ވާދަކުރާނީ 16 އަހަރުން ދަށުގެ އަންހެން އަދި ފިރިހެން ދެ ޓީމެވެ.

Ad by Hajj Corporation

ފިރިހެން ޑިވިޝަންގެ މެޗުތައް

ފިރިހެން ޑިވިޝަންގެ ފުރަތަމަ މެޗު މިއަދު މެންދުރު 12:00 ގައި އިންޑިއާ އާއި ބަންގްލަދޭޝް އާ ދެމެދު ކުޅެވޭނެއެވެ. ރާއްޖޭގެ ފިރިހެން ޓީމުގެ ފުރަތަމަ މެޗު މިރޭ 8:00 ގައި ސްރީލަންކާއާ ދެކޮޅަށް ކުޅޭއިރު، މާދަމާ ހަވީރު އިންޑިއާއާ ދެކޮޅަށް ކުޅޭނެއެވެ. އަދި ހޮނިހިރު ދުވަހު ރާއްޖޭގެ ޓީމު ބަންގްލަދޭޝްއާ ކުރިމަތިލާނެއެވެ.

އަންހެން ޑިވިޝަންގެ މެޗުތައް

އަންހެން ޑިވިޝަންގެ ފުރަތަމަ މެޗު މިއަދު މެންދުރު 2:30 ގައި އިންޑިއާ އާއި ސްރީލަންކާ އާ ދެމެދު ކުޅެވޭނެއެވެ. ރާއްޖޭގެ އަންހެން ޓީމުގެ ފުރަތަމަ މެޗު މިއަދު ހަވީރު 5:30 ގައި ބަންގްލަދޭޝްއާ ދެކޮޅަށް ކުޅޭނެއެވެ. ހުކުރު ދުވަހުގެ ރޭ ސްރީލަންކާއާ ދެކޮޅަށް ކުޅުމަށްފަހު، ހޮނިހިރު ދުވަހުގެ ހަވީރު އިންޑިއާއާ ދެކޮޅަށް ރާއްޖޭގެ އަންހެން ޓީމު ކުޅޭނެއެވެ.

މުބާރާތުގެ އަންހެން އަދި ފިރިހެން ދެ ބައިގެ ރޭންކިން މެޗުތައް ކުޅުމަށް ހަމަޖެހިފައިވަނީ އާދިއްތަ ދުވަހުއެވެ.