މިއަދު އެމެރިކާގައި ފެށުމަށް ތައްޔާރުވަމުންދާ އެކްސްޕޭންޑެޑް ފީފާ ކުލަބު ވޯލްޑްކަޕްގެ ގިނަ މެޗުތަކަށް ޓިކެޓް ނުވިކި، ފީފާއިން ކަންބޮޑުވުން ފާޅުކޮށްފިއެވެ. މުބާރާތް މިއަދު ފަށާއިިރު ގްރޫޕް ސްޓޭޖުގެ ހުރިހާ މެޗުތަކެއްގެ ޓިކެޓް ވިކިހުސްވެފައިވަނީ ހަމައެކަނި ރެއާލް މެޑްރިޑްގެ މެޗުތަކުގައެވެ.

ޔޫރަޕްގެ ޗެމްޕިއަންސް ޕީއެސްޖީ އަދި މެސީ ފަދަ ލެޖެންޑަރީ ކުޅުންތެރިންނާއި، މެންޗެސްޓަރ ސިޓީ އަދި ޗެލްސީ ފަދަ ޕްރިމިއަރ ލީގުގެ ވަރުގަދަ ޓީމުތައް ބައިވެރިވާ މި މުބާރާތުގެ މެޗުތަކަށް ޓިކެޓް ވިއްކުން ދަނީ ވަރަށް ދަށް މިންވަރެއްގައެވެ. ގިނަބަޔަކު ޤަބޫލުކުރާގޮތުގައި ކުލަބް ވޯލްޑްކަޕްގައި މެޗުތަކުގެ ޓިކެޓްތައް ހުރީ އަތްނުފޯރާފަށުގައެވެ. ނަމަވެސް މެޗުތަކުގެ ޓިކެޓް ނުވިކިގެން ފީފާއިން މިހާރު ވަނީ ދެފަހަރެއްގެ މަތީން ޓިކެޓްތަކުގެ އަގު ހެޔޮކޮށްފައެވެ.

ހާޑް ރޮކް ސްޓޭޑިއަމްގައި ކުޅޭ ރެއާލް މެޑްރިޑް އަދި އަލް ހިލާލްގެ މެޗަށް ލިބުނު ތަރުހީބާ ޚިލާފަށް، މިއަދު ކުޅޭ މުބާރާތުގެ ހުޅުވާ މެޗަށް ލިބެމުންދަނީ ވަރަށް ފިނި ތަރުހީބެކެވެ. މުބާރާތް ހުޅުވާމެޗުގައި ވާދަކުރަން ހަމަޖެހިފައިވަނީ މެސީގެ އިންޓަރ މަޔާމީ އާއި މިސްރުގެ އަލް އަހްލީއެވެ.

މެސީގެ ސަބަބުން އާންމުކޮށް ލިބޭ ޝައުގުވެރިކަމާއި، ފުރަތަމަ މެޗަކަށްވުމުގެ ސަބަބުން ލިބެންޖެހޭ ސަމާލުކަން ވެސް މި މެޗަށް ލިބެމުން ނުދެއެވެ. "ދި އެތްލެޓިކް" އިން މި ހަފްތާގައި ރިޕޯޓުކުރި ގޮތުގައި ޓިކެޓުތަކުގެ އަގުތައް މަތިވުމާއި، މުބާރާތާ ގުޅޭ ގޮތުން އޮޅުންތަކެއް ހުރުމުގެ ސަބަބުން އިޖިޕްޓްގެ ޗެމްޕިއަންސް އާ ކުޅޭ މެޗަށް ޓިކެޓް ވިއްކުން ދަނީ ވަރަށް ދަށް މިންވަރެއްގައެވެ.