ނަޝީދާ ޑިމޮކްރެޓްސް ''އެމްޑީޕީ ރޫޅަން'' އަލުން އެމްޑީޕީއަށް
މުހައްމަދު މޫސާ17 ޖޫން 2025 - 11:53
މަޖިލިސްގެ ކުރީގެ ރައީސް އަދި އެމްޑީޕީގެ ކުރީގެ ރައީސް މުޙައްމަދު ނަޝީދާއި ދަ ޑިމޮކްރެޓްސްގެ މެމްބަރުން އަނބުރާ އާއި ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގުޅެން މިއަދު ނިންމައިފިއެވެ.
ދަ ޑިމޮކްރެޓްސްއިން މިގޮތަށް ނިންމާފައި ވަނީ އެ ޕާޓީން މިއަދު ބޭއްވި ނުރަސްމީ ނެޝަނަލް އެސެމްބްލީގައެވެ.
އެ ބައްދަލުވުމުގައި ވަނީ އެ ޕާޓީގެ ހުރިހާ މެމްބަރުން އެނބުރި އެމްޑީޕީއާ ގުޅެން ގަރާރެއް ހުށަހަޅައިފައެވެ. އެ ގަރާރު ވަނީ ފާސްކޮށްފައެވެ.
އެ ނިންމުން ނިންމި ގަރާރުގައި ބުނެފައި ވަނީ އެގޮތަށް ނިންމީ ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުމަށާއި، ރާއްޖޭގެ މުސްތަގްބަލު ރަނގަޅު ކުރުމަށާއި، ޖަވާބުދާރީ ކުރުވަނިވި ދައުލަތެއް އޮތުމަށާއި އަދި ވަރުގަދަ އޮޕަޒިޝަނެއް އޮތުން މުހިންމުވީމައި ކަމަށެވެ.
ނަޝީދު އިސްވެ ހުންނަވައި ޑިމޮކްރެޓިކްސް އުފެއްދުމަށްފަހު 13 ޖުލައި 2023 ގައި އެ ޕާޓީއަށް ސޮއިކުރެއްވުމަށްފަހު ދެެއްކެވި ވާހަކަފުޅުގައި އެމްޑީޕީ ރޫޅާލާނެކަމަށް ތަކުރާރުކޮށް ވަނީ ވިދާޅުވެފައެވެ.
ޑިމޮކްރެޓިސް އިން މި ނިންމުން ނިންމާފައި މިވަނީ އެމްޑީޕީގެ ޗެއާޕާސަން ފައްޔާޒު އިސްމާއީލާއެކު ނަޝީދު އިއްޔެ ބައްދަލުކުރަށްވާފައި ވަނިކޮށެވެ.
