ލިވަރޕޫލްގެ އޯނަރު ލަލީގާ ކުލަބެއް ގަންނަނީ
18 ޖޫން 2025 - 11:51

ލިވަރޕޫލް ފުޓްބޯޅަ ކުލަބުގެ ވެރިފަރާތް ކަމުގައިވާ ފެންވޭ ސްޕޯޓްސް ގްރޫޕް (އެފްއެސްޖީ) އިން ސްޕެއިންގެ ލަލީގާގެ ކުލަބް ގެޓާފޭ ގަތުމަށް މަޝްވަރާކުރަމުންދާ ކަމަށް ސްޕެއިންގެ މީޑިއާ "އޭއެސް" އިން ރިޕޯޓުކޮށްފިއެވެ.
އެފްއެސްޖީގެ ފުޓްބޯޅާގެ ސީއީއޯގެ މަޤާމަށް މައިކަލް އެޑްވާޑްސް އައްޔަންކުރުމަށްފަހު، އެ ކުންފުނިން ގިނަ ކުލަބުތަކެއް ގަތުމުގެ ސްޓްރެޓެޖީއެއް ގެންގުޅެމުންދާއިރު، މިއީ އެ ސްޓްރެޓެޖީގެ ދަށުން އަޅާ މުހިންމު ފިޔަވަޅެއް ކަމަށް ބެލެވެއެވެ.

Ad by Hajj Corporation
ގެޓާފޭގެ އައު ސްޓޭޑިއަމްގެ މަޝްރޫއު މިހާރު ކުރިއަށްދާއިރު، 2027 ވަނަ އަހަރުގެ ފަހުކޮޅު ނުވަތަ 2028 ވަނަ އަހަރުގެ ކުރީކޮޅު ނިމޭނެކަމަށް ލަފާކުރެވޭ މި ސްޓޭޑިއަމަކީ އެފްއެސްޖީއަށް ވަރަށް ޝައުޤުވެރިކަން ހުރި ކަމެކެވެ. ކޮލިސިއަމް ސްޓައިލްގައި ފަރުމާކުރެވޭ މި ސްޓޭޑިއަމްގައި ވީއައިޕީ ވަސީލަތްތަކާއި، ރަނގަޅު އިށީނދެ ތިބެވޭނެ ގޮތްތައް ހިމެނޭނެއެވެ. އަދި ސްޓޭޑިއަމާ އިންވެގެން ހަދާ ސްޕޯޓްސް ސިޓީއިން ކުލަބުގެ ޓްރެއިނިންގ އަދި ޔޫތު އެކަޑަމީގެ ވަސީލަތްތައް ވެސް ވަރުގަދަވެގެންދާނެއެވެ.
ގެޓާފޭގެ ރައީސް އެންޖެލް ޓޯރެސް ވަނީ 2027 ވަނަ އަހަރާ ހަމައަށް އޭނާގެ މަޤާމުން ވަކިވެ، ކުލަބް ވިއްކާލަން ބޭނުންވާކަމަށް ބުނެފައެވެ. އޭނާ ބޭނުންވަނީ މާލީ ގޮތުން ކުޅަދާނަ އަދި ފުޓްބޯޅައާ ބެހޭ ރަނގަޅު ތަޖުރިބާހުރި ފަރާތަކަށް ކުލަބު ވިއްކާލާށެވެ.
މިއީ އެފްއެސްޖީއިން ކުލަބެއް ގަތުމަށް ކުރާ ފުރަތަމަ މަސައްކަތެއް ނޫނެވެ. 2024 ވަނަ އަހަރުގެ ޖުލައި މަހު އެ ކުންފުނިން ވަނީ ފްރާންސްގެ ކުލަބް ބޯޑޯ ގަތުމަށް މަސައްކަތްކޮށްފައެވެ. ނަމަވެސް ސްޓޭޑިއަމް ކުއްޔަށް ހިފުމާ ގުޅޭ މައްސަލަތަކެއް ދިމާވުމާ ގުޅިގެން އެ މަސައްކަތް ވަނީ ހުއްޓިފައެވެ.
އެފްއެސްޖީ އާއި ގެޓާފޭގެ އިސްވެރިންނާ ދެމެދު އިބްތިދާއީ މަޝްވަރާތަކެއް ކުރެވިފައިވީ ނަމަވެސް، މި މުއާމަލާތް ފުރިހަމަވާނެކަން މިވަގުތު ކަށަވަރެއް ނުވެއެވެ. ނަމަވެސް ގެޓާފޭގެ މުހިންމު މަޝްރޫއުތަކާއި އެފްއެސްޖީގެ ޝައުޤުވެރިކަން ހުރި މިންވަރަށް ބަލާއިރު، މި ދެ ފަރާތަށް ވެސް ފައިދާވާނެ ގުޅުމެއް އުފެދިދާނެ ކަމަށް ބެލެވެއެވެ.