ހުޅުމާލޭގައި ތަރައްޤީކުރާ ރެޒިޑެންޝަލް އިމާރާތް ވިއްކަން ހުޅުވާލެވޭނީ ސިވިލް މަސައްކަތުގެ ވިހި އިންސައްތަ ނިންމާ އެޗްޑީސީގެ ހުއްދަ ހޯދައިގެން ކަމަށް އެ ކޯޕަރޭޝަނުން ބުނެފިއެވެ. އަސޭރިއާ ޕްރޮޖެކްޓް ފިޔަވައި ހުޅުމާލޭގައި ތަރައްޤީކުރާ ހުރިހާ ރެސިޑެންޝަލް އިމާރާތެއް ވިއްކުމުގައިވެސް ޢަމަލުކުރާނީ މި ގޮތަށްކަމަށް އެޗް.ޑީ.ސީއިން ނެރުނު ޢިޢުލާނުގައިވެއެވެ.

ހުޅުމާލޭގައި ތަރައްގީކުރަމުންދާ ރެސިޑެންޝަލް އިމާރާތްތަކުން އެޕާޓްމަންޓް ވިއްކަން ފެށުމުގެ ކުރިން، ޖުމްލަ އަގުން އުނިކުރެވޭނެ ގޮތަށް ފީގެ ގޮތުގައި  ގިނަވެގެން 50،000  ރުފިޔާ ޢިމާރާތް ޑިވެލޮޕްކުރާ ފަރާތަކަށް ނެގޭނެ ކަމަށާއި، އެޕާޓްމަންޓް ވިއްކުމުގެ ހުއްދަ ލިބުމުގެ ކުރިން ބުކިން ފީގެ އިތުރުން އެއްވެސް ފައިސާއެއް ކަސްޓަމަރު އަތުން ނުނެގޭނެ ކަމަށް އެޗް.ޑީ.ސީއިން ބުނެއެވެ.

Ad by Hajj Corporation

އަސޭރިޔާ ޕްރޮޖެކްޓުގެ އެޕާޓްމަންޓްތަކަށް ބުކިން ފީގެ ގޮތުގައި ކަސްޓަމަރުންގެ އަތުން އެއްމިލިއަން ރުފިޔާ ފީގެ ގޮތުގައި ނެގުމުގެ ހުއްދަ ޑިވެލޮޕަރަށް ލިބިގެން ވާކަމަށްވެސް މި އިޢުލާނުގައިވެއެވެ. އަދި މި ފީ ނެގުމުގައި ނުވަލައްކަ ފަންސާސްހާސް ރުފިޔާއަކީ އެޕާޓްމަންޓް ގަންނަ ފަރާތައް އަނބުރާ ދޭން ޖެހިއްޖެ ހާލަތުގައި ރިފަންޑްކުރެވޭނެ އަދަދު ކަމަށްވެސް މި ޢިއުލާންގައިވެއެވެ. އަދި އަސޭރިއާ ޕްރޮޖެޓުން ތަރައްޤީކުރާ އިމާރާތުގެ ސިވިލް މަސައްކަތުގެ ވިހި އިންސައްތަ ނުނިމުނަސް  އެޗްޑީސީއާއި ޑިވެލޮޕަރާ ދެމެދު އުފައްދާފައިވާ  އެސްކްރޯ އެކައުންޓަކަށް ފައިސާ  ޖަމާކޮށް އެ ޕްރޮޖެކްޓުގެ އެޕާރޓްމެންޓް ވިއްކޭނެ ކަމަށްވެސް އެޗްޑީސީގެ މި އިޢުލާނުގައިވެއެވެ.

މީގެ ކުރިން ހުޅުމާލޭގައި އެޕާރޓްމެންޓް ވިއްކުމުގެ ނަމުގައި ސްކޭމްތައް ގިނަވެ އަދިވެސް މީގެން އެތަށް މައްސަލަ ތަކެއް ކޯޓުގައި އެބަ ހިނގައެވެ.