އެމްޑީޕީން ރިޔާސީ އިންތިޚާބާ ދިމާކޮށް ގަސްތުގައި ވަގުތީ ވަޒީފާތައް އުފައްދައި، ގޯތީގެ ރަޖިސްޓަރީކަމަށްބުނެ ބަހާލީ ކަރުދާސްތަކެއް ކަމަށާއި، ރައީސް ޑރ. މުޙައްމަދު މުޢިއްޒުގެ ސިޔާސަތަކީ ރައްޔިތުން ބާކީކުރުންނޫންކަމަށް މައްޗަންގޮޅި މެދު ދާއިރާގެ މެންބަރު އަހްމަދު ޒަމީރު ވިދާޅުވެއްޖެއެވެ.

ޒަމީރު މިހެން ވިދާޅުވީ، މި ސަރުކާރުން މުވައްޒަފުން ވަޒީފާއިން ވަކިކުރާކަމަށް ބުނެ އެމްޑީޕީން ނެރުނު ބަޔާނަށް ދިން ރަށްދެއްގައެވެ.

މެންބަރު ޒަމީރު ވިދާޅުވީ، އެމްޑީޕީ އިން ވެރިކަމާ ހަވާލުވެ، އެމްޑީޕީއިން ވަކާލާތު ކުރި ސިޔާސަތާ ޙިލާފަށް އެޕާޓީގެ އަމިއްލަ މެންބަރުން ވަކިކޮށް އަދި ސިޔާސީ ފިކުރުތަފާތު ވިސްނުމާ ނުގުޅޭ ފަރުދުން ވަޒީފާއިން ވަކިކުރުމުގެ ސަގާފަތެއް ފެށިކަމަށެވެ. އަދި އެކަމުން ނުކުތް ނަތީޖާ އަކީ އެމްޑީޕީއަށް ރައްޔިތުން ދެވަނަ ފުރުސަތެއް ނުދިނުން ކަމަށް ޒަމީރު ވިދާޅުވިއެވެ.

މީގެ އިތުރުން އެމްޑީޕީގެ ވެރިކަމުގައި، ގިނަ ވަގުތީ ވަޒީފާތަކެއް އުފެއްދިކަމަށް ޒަމީރު ވިދާޅުވިއެވެ.

''ސުވާލު އުފައްދާ ގިނަ ވަޒީފާތައް އުފެއްދީ ވަގުތީ ކޮންޓްރެކްޓްތަކެއްގެ ދަށުން އެބޭފުޅުން އެކޮންޓްރެކްޓަތައް ފަރުމާކޮށް މުއްދަތު ކަނޑައެޅީ ވެސް، ވަކިން ހާއްސަކޮށް ރިޔާސީ އިންތިހާބާ ދިމާކޮށް ވަގުތު ކަނޑައަޅައިގެން، ރިޔާސީ އިންތިޚާބުގެ ދުވަސްވަރު ގަސްތުގައި ވަގުތީ މަގާމުތަކެއްގެ ގޮތުގައި އުފެއްދި ވަޒީފާތައް،'' ޒަމީރު ވިދާޅުވެފަވެއެވެ.

މިއީ ފަސް އަހަރުގެ ދައުރުގައި ދެމެހެއްޓެނިވި ވަޒީފާގެ ބާޒާރެއް އުފެއްދުމަށް އެމްޑީޕީގެ ނުކުޅެދުންތެރިކަން ވަރަށް ބޮޑަށް ހާމަވާކަމެއް ކަމަށާއި، އަދި އެއީ މާނަހުރި އިގްތިސާދީ އިސްލާހުތައް ގެނައުމަށް އެމްޑީޕީން ނުކުޅެދުނުކަން ހާމަކޮށްދޭ ކަމެއްކަމަށް ޒަމީރު ވަނީ ވިދާޅުވެފައެވެ.

އޭނާ ވިދާޅުވީ، އެމްޑީޕީގެ ވެރިކަމުގައި އަސާސީ ބޯހިޔާވަހިކަން ފޯރުކޮށްދިނުން ހިމެނޭ ގޮތަށް އާންމުންނަށް ކޮންމެހެން ކޮއްދޭންޖެހޭ ވައުދުތައް ފުއްދުމުގައި ވެސް އެމްޑީޕީގެ ލީޑަރޝިޕް ވަނީ ނުކުޅެދިފައި ކަމަށެވެ.

'' ފަހުވަގުތު ގޯތީގެ ރަޖިސްޓަރީއޭކިޔާފަ ބަހާލީ ކަރުދާސްތަކެއް ،އެވެސް ވުޖޫދުގަ ނެތް ތަންތަން (ނުހިއްކާ ހުރި ތަންތަން) އެކި މަޝްރޫއުތަކަށް ރައްޔިތުންގެ ފައިސާއިން ބޮޑު މާލީ ހޭދަކުރި ނަމަވެސް، މި ފައިސާގެ ބޮޑު ބައެއް ވަނީ ވީނުވީއެއް ނޭންގި ނެތިގެން ގޮސްފަ، ގިނަ މަޝްރޫއުތައް ފުރިހަމަ ނުވޭ.'' ޒަމީރު ވިދާޅުވެފަވެއެވެ.

އޭނާ ވިދާޅުވީ، އެމްޑީޕީގެ ނާގާބިލް މެނޭޖްމަންޓުން ދައްކުވައިދެނީ ވެރިކަމާއި ރައްޔިތުންނަށް ޖަވާބުދާރީވުމުގަ ފުޅާ ދާއިރާއެއްގައި ނާކާމިޔާބުވެފަވާ މަންޒަރު ކަމަށެވެ.

''‏މިއާ ހިލާފަށް ރައީސް ޑރ.މުހައްމަދު މުއިއްޒުގެ ލީޑަޝިޕްގައި ސަރުކާރާއި ދައުލަތުގެ ކުންފުނިތަކުގެ ތެރެއިން އެމްޑީޕީގެ މެންބަރުން އިސް މަގާމުތަކުން ވަކިކޮށްފައެއް ނުވޭ، ރައީސް ⁦ މުޢިއްޒު⁩ ގެ އުސޫލަކީ ސިޔާސީ ޚިޔާލުތަފާތުވުންތަކުގެ މައްޗަށް ބިނާކޮށް ރައްޔިތުން ބާކީ ކުރުމެއް ނޫން، ހުރިހާ ފަރާތްތަކެއް ހިމެނޭ ގޮތަށް ހެޔޮ ވެރިކަމެއްކުރުން.'' ޒަމީރު ވިދާާޅުވެފަވެއެވެ.

'' މިއީ އިންސާފުވެރިކަމާއި، ޤައުމީ އެއްބައިވަންތަކަމާއި، ޒިންމާދާރު ވެރިކަމެއް އަދި އިގްތިސާދީ ހަމަޖެހުމަށް ކުރާ ޚިދުމަތް ވަރުގަދަކޮށް، ދާއިމީ އަދި ހަމަޖެހޭ ވަޒީފާއެއް ހޯދައިދީ ދިވެހިންނަށް ފުއްދުންތެރި މުސްތަގްބަލެއް ހޯދައިދިނުން'' ޒަމީރު އިތުރަށް ވިދާޅުވެފަވެއެވެ.