ބިދޭސީން ރެކްރޫޓްކުރާ އެޖެންސީތަކަކީ ރަޖިސްޓަރީކޮށްގެން ހިންގާ އެޖެންސީތަކެއްކަން ކަށަވަރުކުރުމަށް އެމްބަސީތައް މެދުވެރިކޮށް ބަލާނެކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހުސާން ވިދާޅުވެއްޖެއެވެ.

ދައުލަތުގެ މީޑިއާގެ ޕްރޮގްރާމެއްގައި ވާހަކަފުޅު ދައްކަވަމުން ވަޒީރު ވިދާޅުވީ، ބިދޭސީން ރެކްރޫޓްކުރާ އެޖެންސީތަކަކީ ކޮބައިތޯ ބަލައި، އެ އެޖެންސީތަކަކީ ރަޖިސްޓަރީކޮށްގެން ހިންގާ ތަންތަންކަން ކަށަވަރުކުރާނެ ކަމަށެވެ. އަދި މި އެޖެންސީތައް ރާއްޖޭގެ ސިސްޓަމްގައިވެސް ރަޖިސްޓަރީކުރަންޖެހޭނެ ކަމަށް ވަޒީރު ވިދާޅުވިއެވެ.

Ad by Hajj Corporation

މިއީ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ މަސައްކަތުގެ ތެރެއިން އަޅާ ފިޔަވަޅެކެވެ. ބިދޭސީންގެ މައްސަލަ ޙައްލުކުރުމަށް ފަށާފައިވާ ކުރަނގީ އޮޕަރޭޝަންހެ ދެވަނަ ފިޔަވަހީގެ މަސައްކަތްތައް ޖުލައި 1ގައި ފެށުމަށް ނިންމާފައިވާކަމަށް ވެސް ވަޒީރު ވިދާޅުވިއެވެ. އެމަސައްކަތުގެ ތެރެއިން މިހާތަނަށް 151،694 މީހުންގެ ބަޔޯމެޓްރިކްސް ނަގައި، މަޢުލޫމާތު އެއްކޮށްފައިވާއިރު، ވޭތުވެދިޔަ ދޮޅު އަހަރުގެ ތެރޭގައި 7549 ބިދޭސީން ވަނީ އަނބުރާ އެމީހުންގެ ގައުމަށް ފޮނުވާލާފައިވާކަމަށް ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، ކުރެވުނު އަނެއް އެންމެ ބޮޑު އެއް މަސައްކަތަކީ، ދަޢުލަތަށް ދައްކަންޖެހޭ ފީތައް ހޯދުމުގެ މަސައްކަތްކަމަށެވެ. އެގޮތުން މިހާތަނަށް ބިދޭސީންނާ ގުޅޭ އެކިއެކި ފީތަކުގެ ގޮތުގައި ބިލިއަނަކަށްވުރެ ގިނަ ރުފިޔާ ދަޢުލަތަށް ހޯދާފައިއިވާކަން ވަޒީރު ފާހަގަކުރެއްވި އެވެ.

މީގެއިތުރުން ބިދޭސިން ރާއްޖެ ގެނައުމުގެ ނިޒާމު ހަރުދަނާކޮށް، އެކަން ރެގިއުލޭޓްކުރެވޭނެ ނިޒާމުވެސް ހަރުދަނާކުރާނެކަމަށެވެ. މިކަން ކުރާނީ މަސައްކަތަށް ބިދޭސީން ގެންނަ ޤައުމުތަކާ ސަރުކާރުގެ ކަމާގުޅޭ އިދާރާތައް ގުޅިގެންކަމަށް ވަޒީރު ވިދާޅުވިއެވެ. ވަޒީރު ވިދާޅުވީ ބިދޭސީން ގެނައުމަށްފަހު، އެމީހުންލައްވަ މަސައްކަތްކުރުވަނީވެސް ގަވައިދާ އެއްގޮތަށްތޯ ބަލާނެކަމަށެވެ. އެގޮތުން އެންގުމެއްނެތި ރެއިޑްތައް ހިންގުމާއި މަސައްކަތު ސައިޓްތައްވެސް މޮނިޓަރކުރާނެކަމަށް ވިދާޅުވިއެވެ.