ދުންފަތުގެ އިސްތިއުމާލު ކުރުން އެއްކޮށް ހުއްޓާލާ ރަށްރަށުގެ ރައްޔިތުންނަށް ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭ ގޮތުން ދިރާސާއެއް ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، މިހަފްތާގައި ބޭއްވި ވަޒީރުންގެ މަޖިލީހުގެ ޖަލްސާގައި، ދުންފަތުގެ އިސްތިއުމާލުކުރުން އެއްކޮށް ހުއްޓާލާ ރަށްރަށުގެ އާބާދީގެ ކޮންމެ ރައްޔިތެއްގެ ބޭންކް އެކައުންޓަށް ޖަމާކޮށްދޭ ފައިސާގެ އިނާމެއް ނުވަތަ އިނާޔަތެއް ދިނުމާ ގުޅޭ ގޮތުން ދިރާސާއެއް ކުރުމަށްފަހު، އެކަމާގުޅޭ ކަރުދާހެއް ތައްޔާރުކޮށް ހުށަހެޅުމަށް ކަމާބެހޭ ވަޒީރުންނަށް އަންގަވާފައިވާނެކަމަށެވެ.

Ad by Hajj Corporation

މިއީ ދުންފަތުގެ އިސްތިއުމާލު ކުރުމުން ދުރުހެލިވެފައިވާ ދުޅަހެޔޮ މުޖުތަމައަކަށް ހެދުމަށް ސަރުކާރުން ކުރަމުންދާ މަސައްކަތުގެ ތެރެއިން އަޅާ އައު ފިޔަވަޅެކެވެ.

ދުންފަތުގެ އިސްތިއުމާލުން މުޖުތަމައު ސަލާމަތްކުރުމަށް މި ސަރުކާރުން ވަނީ ގިނަގުނަ ފިޔަވަޅުތަކެއް އަޅާފައެވެ. މީގެ ތެރޭގައި ވޭޕް އަދި އިލެކްޓްރޯނިކް ސިގިރެޓް ރާއްޖެ އެތެރެކުރުން މަނާކުރުމާއި، "ޖެނެރޭޝަނަލް ބޭން" ހިމެނެއެވެ. ،މި ސިޔާސަތުގެ ދަށުން 2005 ވަނަ އަހަރުގެ ފަހުން އުފަން ވާ މީހުންނަށް ދުންފަތުގެ އިސްތިއުމާލު ކުރުން މަނާކުރުމަށް ވަނީ ނިންމާފައެވެ.

މިހާރު ހުށަހެޅިފައިވާ އައު އިނާޔަތުގެ ސަބަބުން ދުންފަތުގެ އިސްތިއުމާލު ކުރުން ހުއްޓާލުމަށް ރައްޔިތުންނަށް އިތުރު ހިތްވަރެއް ލިބިގެންދާނެ ކަމަށާއި މިކަމުގެ ސަބަބުން ދިވެހިރާއްޖޭގެ ރަށްތައް ދުންފަތުން މުޅިން ސަލާމަތްވެފައިވާ ރަށްތަކަކަށް ހެދުމަށް މަގުފަހިވެގެންދާނެ ކަމަށްވެސް ލަފާކުރެވެއެވެ.