ކުލަބް އެމްސީއެލްޕީގެ ފުރަތަމަ ގޭމިންގ ނައިޓް ރޭގައި ކާމިޔާބުކަމާއެކު ނިންމާލާފައެވެ. މި ގޭމިންގ ނައިޓް ފައްޓަވައިދެއްވީ މިނިސްޓަރ އާދަމް ޝަރީފު ޢުމަރާއި، ސްޓޭޓް މިނިސްޓަރ މުޙައްމަދު މާހިރު ވާދަކުރެއްވި ޓޭބަލް ޓެނިސް މެޗަކުންނެވެ. މި މެޗުގައި ދެ ސެޓް އެއް ސެޓުން މިނިސްޓަރ އާދަމް ޝަރީފު ޢުމަރު ވަނީ ކާމިޔާބުކޮށްފައެވެ.

ރޭ ބޭއްވުނު ގޭމިންގ ނައިޓްގައި ކުލަބުގެ ގިނަ އަދަދެއްގެ މެންބަރުން ބައިވެރިވެވަޑައިގެންނެވިއެވެ. ޗެސް މުބާރާތުގެ ފައިނަލްގައި ޑެޕިޔުޓީ މިނިސްޓަރ އަޙްމަދު ވަޙީދު ޢަލީއާއި، ޑެޕިޔުޓީ މިނިސްޓަރ އިސްމާޢީލް ނާފިޢު ވާދަކުރެއްވި މެޗު ކާމިޔާބުކުރެއްވީ ޑެޕިއުޓީ މިނިސްޓަރ އިސްމާޢީލް ނާފިޢުއެވެ.

Ad by Hajj Corporation

ޓޭބަލް ޓެނިސް މުބާރާތުގެ ފައިނަލްގައި އޮފީސް އެސިސްޓެންޓް އަޙްމަދު ޙިލްމީއާއި، ޑެޕިޔުޓީ މިނިސްޓަރ ޙަސަން އިރުފާން ވާދަކުރެއްވި މެޗު ކާމިޔާބުކުރީ އަޙްމަދު ޙިލްމީއެވެ. އަދި ކެރަމް މުބާރާތުގެ ފައިނަލްގައި ޑިރެކްޓަރ ނަޝާޔާ ވަޙީދާއި، ލޭބަރ ޢުބައިދުﷲ ޢުމަރު ވާދަކުރެއްވި މެޗު ކާމިޔާބުކުރީ ޢުބައިދުﷲ ޢުމަރުއެވެ.

މުބާރާތްތަކުގައި ވާދަކޮށް މޮޅުވި ފަރާތްތަކަށް ޓްރޮފީއާއި ހަނދާނީ ލިޔުން ހަވާލުކޮށްދެއްވީ މިނިސްޓަރ އާދަމް ޝަރީފު ޢުމަރެވެ. ގޭމިންގ ނައިޓުގެ ނަތީޖާ އިޢުލާންކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކުލަބް އެމްސީއެލްޕީގެ ރައީސް، ޑިރެކްޓަރ ޖެނެރަލް އަޙްމަދު މައުޞޫމް ވިދާޅުވީ މިފަދަ ގޭމިންގ ނައިޓެއް މަހަކު އެއްފަހަރު ބޭއްވުމަށް ޚިޔާލުކުރައްވާ ކަމަށެވެ.