ފީފާ ކްލަބް ވޯލްޑް ކަޕްގެ ގްރޫޕް އެފްގައި ރޭގައި ދެކުނު ކޮރެއާގެ އުލްސާން ހިއުންޑާއީ އާއި ދެކޮޅަށްކުޅެ، ބޮރޫޝިޔާ ޑޯޓްމަންޑް ވަނީ 1-0 ގެ ނަތީޖާއަކުން މޮޅުވެފައެވެ. މި މޮޅާއެކު ގްރޫޕްގެ އެއްވަނަ ޓީމުގެ ގޮތުގައި ޑޯޓްމަންޑް ވަނީ މުބާރާތުގެ ގަދަ 16 އަށް ދަތުުރކޮށްފައެވެ.

އެމެރިކާގެ ސިންސިނާޓީގެ ޓީކިއުއެލް ސްޓޭޑިއަމްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު ޖެހީ މެޗުގެ 36 ވަނަ މިނިޓުގައެވެ. އެއީ ޖޯބް ބެލިންހަމްގެ އެސިސްޓަކުން ޑެނިއެލް ސްވެންސަން ޖެހި ލަނޑެކެވެ. މި މެޗު ކާމިޔާބު ކުރުމާއެކު ޑޯޓްމަންޑަށް ވަނީ ކުޅުނު ތިން މެޗުން 7 ޕޮއިންޓް ހޯދާފައެވެ.

މުބާރާތުގެ ދެވަނަ ބުރުގައި ޑޯޓްމަންޑް ކުޅޭނީ ގްރޫޕް އީގެ ދެވަނަ ޓީމު މެކްސިކޯގެ މޮންޓެރޭ އާއި ދެކޮޅަށެވެ. މިގްރޫޕުގައި ބްރެޒިލްގެ ފްލުމިނޭންސް ވަނީ ސައުތު އެފްރިކާގެ މަމެލޮޑީ ސައުންޑް އާއި ވާދަކޮށް 0-0 އިން އެއްވަރުވެ، ގްރޫޕްގެ ދެވަނައިގައި ގަދަ 16 އަށް ދަތުރުކޮށްފައެވެ. ފްކުމިނޭންސް ގަދަ 16 ގައި ވާދަކުރާނީ އިޓަލީގެ އިންޓަރ މިލާނާއި ދެކޮޅަށެވެ.