އޭއެފްސީ ފުޓްސަލް އޭޝިއަން ކަޕް 2026 ގައި ވާދަކުރުމަށް ކޮލިފިކޭޝަންގައި 31 ޓީމުގެ މެދުގައި ގުރުއަތުލުން މިއަދު ކުއާލަލަމްޕޫރުގައި ހުންނަ އޭއެފްސީ ހައުސްގައިކުރިޔަށް ގެންގޮސްފިއެވެ. މި މުބާރާތުގެ ފައިނަލް ބުރު ކުޅެން ހަމަޖެހިފައިވަނީ އިންޑޮނޭޝިއާގައެވެ.

ކޮލިފައިންގ މެޗުތައް ކުޅެން ހަމަޖެހިފައިވަނީ 2025 ވަނަ އަހަރުގެ ސެޕްޓެމްބަރު 20 އިން 24 އަށެވެ. ގުރުއަތުލުމުގައި ޓީމުތައް ބަހާލެވިފައިވަނީ ހަތަރު ޓީމުގެ ހަތް ގްރޫޕަކަށާއި ތިން ޓީމުގެ އެއް ގްރޫޕަކަށެވެ. ކޮންމެ ގްރޫޕަކުން އެއްވަނައަށް އަންނަ ޓީމާއި، ދެވަނައަށް އަންނަ ޓީމުތަކުގެ ތެރެއިން އެންމެ މޮޅު ހަތް ޓީމަކަށް ފައިނަލް ބުރަށް ދިއުމުގެ ފުރުސަތު ލިބޭނެއެވެ.

Ad by Hajj Corporation

މިމުބާރާތުގައި ރާއްޖެ ގްރޫޕް އެޗްގައި ހިމެނިފައިވާއިރު، މިގްރޫޕްގައި ދެން ހިމެނެނީ އަފްޣާނިސްތާނުގެ އިތުރުން މިޔަންމާއެވެ. މިޔަންމާއަކީ މި ގްރޫޕްގެ މެޗުތައް ބާއްވާ ޤައުމެވެ. މި ގްރޫޕަކީ ތިން ޓީމު ހިމެނޭ ހަމައެކަނި ގްރޫޕެވެ.

މުބާރާތުގެ ޑިފެންޑިންގ ޗެމްޕިއަން އަދި 13 ފަހަރު މުބާރާތް ކާމިޔާބުކޮށްފައިވާ އީރާން ވަނީ ގްރޫޕް ޖީގައި މެލޭޝިއާ، ޔޫއޭއީ އަދި ބަންގްލަދޭޝްއާ އެކުގައެވެ. މި ގްރޫޕްގެ މެޗުތައް ބާއްވާނީ މެލޭޝިއާގައެވެ.

އޭއެފްސީ ފުޓްސަލް އޭޝިއަން ކަޕް 2026 ގެ ފައިނަލް މަރުހަލާ ކުޅެން ހަމަޖެހިފައިވަނީ 2026 ވަނަ އަހަރުގެ ޖެނުއަރީ 27 އިން ފެބްރުއަރީ 7 އަށް އިންޑޮނޭޝިއާގައެވެ.