ކްރިސްޓަލް ޕެލަސްގެ ޑިފެންޑަރު މާކް ގުއެހީ ގެނައުމަށް 30 މިލިއަން ޕައުންޑަށް ވުރެ ބޮޑު އަގެއް ހުށަހަޅައިފިއެވެ. މިގޮތުން މިކުޅުންތެރިޔާގެ ސޮއި ހޯދުމާއި ގާތުގައި ވާކަމަށް ރިޕޯރޓްތައް ބުނެއެވެ.

24 އަހަރުގެ އިނގިރޭސި ޑިފެންޑަރާއެކު މަޝްވަރާތައް ކުރިއަށްދާކަމަށް ލިވަރޕޫލްގެ ރެކްރޫޓްމަންޓް ޓީމުން ހާމަކޮށްފައިވެއެވެ. ގުއެހީ އަކީ މިދިޔަ މޭ މަހު ކްރިސްޓަލް ޕެލަސް އެފްއޭ ކަޕް ކާމިޔާބުކުރުމުގައި ޓީމުގެ ކެޕްޓަންކަން ކުރި ކުޅުންތެރިއެކެވެ.

ސެލްހަރސްޓް ޕާކުގައި އޭނާގެ ކޮންޓްރެކްޓަށް އަދި އަހަރެއް ބާކީ އޮތްއިރު، އިތުރަށް ކޮންޓްރެކްޓް އައުކުރުމުގެ ޝައުގުވެރިކަމެއް ގުއެހީ ދައްކާފައެއް ނުވެއެވެ. އެހެންކަމުން ލިވަރޕޫލަށް އޭނާ ގެނައުމަށް ލިބޭ ރަނގަޅު ފުރުސަތެއްކަމަށް ބެލެވެއެވެ.

2026 ވަނަ އަހަރުގެ ވޯލްޑް ކަޕްގައި އިނގިރޭސި ޓީމުގައި ތަމްސީލުކުރުމުގެ އުއްމީދުގައި ހުރި ގުއެހީއަށް، ލިވަރޕޫލްގައި ގަވާއިދުން ކުޅުމުގެ ފުރުސަތު ބޭނުންވާނެކަމަށް ބެލެވެއެވެ.

މިލޮސް ކަރކެޒް، ޖެރެމީ ފްރިމްޕޮންގް އަދި ފްލޯރިއަން ވަރޓްޒް ފަދަ ކުޅުންތެރިން ފަހުން ސޮއިކުރުމަށްފަހު، ގުއެހީ ގެނައުމަކީ ލިވަރޕޫލްގެ ޑިފެންސަށް ލިބޭނެ ވަރަށް މުހިންމު އިތުރުވުމެއް ކަމުގައި ބެލެވެއެވެ.