މިއަދު ރާއްޖޭގައި ރަސްމީކޮށް ފެށި ބައިނަލްއަގުވާމީ ބަންކަރިންގެ ޚިދުމަތް ފެށުމަށް ސަރުކާރުން 20 މިލިއަން ޑޮލަރު ޚަރަދުކުރި ކަމުގައި އިގްތިސާދީ ކަންތައްތަކާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ހއ. ހޯރަފުށީގައި ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މިއަދު ފެށި ބަންކަރިންގެ ޚިދުމަތް ފަށައިގަތުމުގައި ސަރުކާރުން އެންމެ ބޮޑު އިސްކަމެއް ދޭނީ ވަކި ގައުމަކާ ވާދަކުރާކަށެއް ނޫން ކަމަށާއި، އެހެން ނަމަވެސް އެ ޚިދުމަތް ފުޅާކުރުމަށް ކަމަށެވެ. އަދި އެ މަސައްކަތް ފުޅާ ކުރުމަށް އެ މަސައްކަތް ކުރާ އެސްޓީއޯއަށް ފުރުސަތު އޮންނާނެ ކަމުގައި ވަޒީރު ވިދާޅުވިއެވެ.

Ad by Hajj Corporation

ވަޒީރު ވިދާޅުވީ، އެ ޚިދުމަތް ފެށުމުގެ ހިތްވަރު ކުރީ ސަރުކާރުގައި ނެތް ނަމަވެސް، މި ސަރުކާރުގައި އެ ހިތްވަރު ހުންނާނެ ކަން ސާބިތުކޮށްދީފައިވާ ކަމަށެވެ. އެކަމަށް 15 - 20 މިލިއަން ޑޮަލަރު ޚަރަދުކޮށް، އެންމެ ހަ މަސް ދުވަހުގެ ތެރޭގައި އެކަން ކުރުމަކީ އޭގެ ހެއްކެއް ކަމުގައި ވަޒީރު ވިދާޅުވިއެވެ. އަދި އެކަމުގެ ސަބަބުން، އެސްޓީއޯ އާ އެ މަސައްކަތްތައް ގުޅިގެން ކުރާ ވިޓޯލް އިން، ރާއްޖޭގައި އިތުރު އިންވެސްޓްމެންޓްތަކެއް ކުރުމަށް ތައްޔާރަށް ތިބި ކަމުގައި ވެސް ވަޒީރު ވިދާޅުވިއެވެ.

"އެހާ އަވަހަށް ރާއްޖޭގައި އެ (ބަންކަރިންގެ) ވިޔަފާރި ފެށުމުން އެބޭފުޅުން (ވިޓޯލް) ވަނީ ރާއްޖޭގައި އިތުރު އިންވެސްޓްމެންޓްތައް ކުރާނެ ކަމަށް ރައީސުލްޖުމްހޫރިއްޔާ އަށް ދަންނަވާފައި،" ވަޒީރު ސައީދު ވިދާޅުވިއެވެ.

ވަޒީރު ވިދާޅުވީ، ސަރުކާރުން ޓާގެޓްކުރާ އެންމެ ޕަސެންޓެއްގެ ބޯޓުތަކުގެ ޓާގެޓް ޙާސިލުވުމަކީ ވެސް، ރައީސް ޑރ. މުޙައްމަދު މުޢިއްޒުގެ ތަސައްވުރު ހާސިލް ވުމަށް ލިބޭނެ ބާރެއް ކަމަށެވެ. އެގޮތުން އޮން ޕޯޓު ފެސިލިޓީއެއް ހަދައި އެ ޚިދުމަތް އޭރުން ފުޅާ ކުރެވޭނެ ކަމުގައި ވަޒީރު ވިދާޅުވިއެވެ.

މިއަދު ރާއްޖޭގައި ރަސްމީކޮށް ފެށި ބައިނަލްއަގުވާމީ ބަންކަރިންގެ ޚިދުމަތް ފޯރުކޮށްދެނީ އެސްޓީއޯއިންނެވެ. އެގޮތުން އެ ޙިދުމަތް ދިނުމަށް އެސްޓީއޯއިން ބޭނުންކުރާނީ އެ ކުންފުނީގެ ސަބްސިޑަރީ ކުންފުނި، އެމްއެސްއެސް އިން އޮޕަރޭޓްކުރަމުން އަންނަ "ވައިސީ ބެރިއާ" ނަމަކަށް ކިޔާ އުޅަނދެކެވެ. އެ އުޅަނދަކީ މަހެއްގެ މައްޗަށް 200 ޓަނުގެ ތެޔޮ އުފުލޭ ބޯޓެކެވެ. އަދި އޭގެ އިތުރަށް އެސްޓީއޯ އިން ވަނީ ބަންކަރިންގެ ޙިދުމަތަށް އިތުރު ދެ ބޯޓެއް ވެސް ގެނެސްފައެވެ. އެގޮތުން ގެނެސްފައިވަނީ 4،000 މެޓްރިކް ޓަނުގެ ތެޔޮ އުފުލޭ ބޯޓަކާއި އަދި ،3200 މެޓްރިކް ޓަނުގެ ތެޔޮ އުފުލޭ ބޯޓެކެވެ.