ގައުމުގައި ފިތުނަ އުފައްދައި ހަލަބޮލިކަން ގާއިމު ކުރުމަކީ ރައްޔިތުންނަށް ނުވަތަ ގައުމަށް ލިބޭނެ އެއްވެސް މޮޅެއް ނޫން ކަމަށް އެޑްވައިޒަރ ޓް މިނިސްޓަރ އެޓް މިނިސްޓްރީ އޮފް ޔޫތު އެންޑް އެމްޕަވަރމަންޓް، އިންފޮމޭޝަން އެންޑް އާޓްސް އަހްމަދު ނަރީޝް ވިދާޅުވެއްޖެއެވެ.

މިނިސްޓްރެއްގެ ފެންވަރުގައި ޔޫތް މިނިސްޓަރުގެ އެޑްވައިޒަރެއްގެ މަގާމު ފުރުއްވަމުން ގެންދަވާ ނަރީޝް މިފަދައިން ވިދާޅުވީ މީސްމީޑިއާ މަންސަތަކުގައި ކުރެއްވި ޕޯސްޓެއްގައެވެ.

Ad by Hajj Corporation

އޭނާ މިހެން ވިދާޅުވީ، ރައީސް ޑރ. މުހައްމަދު މުޢިއްޒު ޖަޖްކުރުމަށް، އެމަނިކުފާނު ވެވަޑައިގަތް ވައުދުތައް ފުއްދަވާފައިވާ މިންވަރަށް ބަލައި، 2028ގެ ރިޔާސީ އިންތިހާބާ ހަމައަށް މަޑުކޮށްލެއްވުމަށް އެދިވަޑައިގަންނަވާކަމަށެވެ. އަދި ނަރީޝް ވަނީ ގައުމަށްޓަކައި ކެތްތެރިވުމާއި ބިނާކުރަނިވި ގޮތްތަކަށް އިސްކަންދިނުމަށް އިލްތިމާސްކުރައްވާފައެވެ.

އޭނާގެ ވާހަކާގައި ފާހަގަކުރެއްވި ގޮތުގައި، ރައީސް މުޢިއްޒުގެ މިހާރުގެ ދައުރުގެ މުއްދަތު ހަމަވަންދެން ކެތްތެރިވާން ޖެހެއެވެ. އަދި 2028 ވަނަ އަހަރު ބާއްވާ ރިޔާސީ އިންތިހާބަށް ގައުމު ކުރިމަތިލާއިރު، ރައީސް މުޢިއްޒު ވެވަޑައިގެންނެވި ވައުދުތައް ފުއްދަވާފައިވާ މިންވަރަށް ރިޢާޔަތްކޮށް އެމަނިކުފާނު ޖަޖްކުރުމަށް އޭނާ ވަނީ އިލްތިމާސްކުރައްވާފައެވެ.

ފާޑުކިޔުމާ ބެހޭގޮތުން ވާހަކަ ދައްކަވަމުން ނަރީޝް ވިދާޅުވީ، ފާޑުކިޔާނަމަ ބިނާކުރަނިވި ގޮތަކަށް ފާޑުކިޔަން ޖެހޭނެ ކަމަށެވެ. އަދި ވެރިކަންކުރުމަށް އެހާ ޝައުގުވެރިވާނަމަ، 2028 ވަނަ އަހަރު ބާއްވާ ރިޔާސީ އިންތިހާބަށް ތައްޔާރުވުމަށް އޭނާ ވަނީ ގޮވާލައްވާފައެވެ.

އެންމެ މުހިންމު ނުކުތާއަކަށް ނަރީޝް ފާހަގަކުރެއްވީ، ގައުމުގައި ފިތުނަ އުފައްދައި، ހަލަބޮލިކަން ގާއިމު ކުރުމަކީ ރައްޔިތުންނަށް ވެސް އަދި ގައުމަށް ވެސް ލިބޭނެ އެއްވެސް މޮޅެއް ނޫން ކަމެވެ. ގައުމުގެ ހަމަޖެހުމާއި ތަރައްގީއަށް މަގުފަހިކުރާނެ ގޮތްތަކަށް އިސްކަންދިނުމުގެ މުހިންމުކަން އޭނާ ވަނީ ފާހަގަކުރައްވާފައެވެ.