ކްލަބް ވޯލްޑް ކަޕްގެ ކުއާޓަރ ފައިނަލްގައި ފްލޫމިނޭންސޭ އާއި ދެކޮޅަށް ކުޅުމުގެ ދެދުވަސް ކުރިން އަލްހިލާލުން ވަނީ އެ ޓީމުގެ ފޯވާޑް ލައިން ވަރުގަދަކޮށް، އައު ކުޅުންތެރިއެއް ގެނައިކަން އިޢުލާންކޮށްފައެވެ. އެގޮތުން އެ ޓީމުން ވަނީ ސައުދީ ޕްރޯ ލީގުގެ އައްޝަބާބުގެ ސްޓްރައިކަރު އަބްދުއްރައްޒާޤް ހަމްދުﷲ އާއެކު އެއްބަސްވުމެއްގައި ސޮއިކޮށްފައެވެ.

ހަމްދުﷲ ގެ ސޮއިހޯދަން އަލް ހިލާލް އަށް ޖެހުނީ އެންމެފަހުން މިމުބާރާތުގެ ގަދަ 16ގައި ސިޓީގެ މެޗަށްފަހު ކުލަބުގެ އެޓޭކިންގ ގެ މުހިންމު ކުޅުންތެރިއެއްކަމުގައިވާ ލިއޮނާޑޯއަށް އަނިޔާވުމާއި ގުޅިގެންނެވެ. މީގެ އުތުރުން ޓީމުގެ އެންމެ މުހިންމު ފޯވާޑްކަމަށްވާ މިޓްރޮވިޗް ވެސް މިވަގުތު ހުރީ އަނިޠާގައެވެ.

Ad by Hajj Corporation

ހަމްދުﷲ އަކީ ފާއިތުވި ސީޒަނުގައި ސަޢުދީގެ އައްޝަބާބަށް ކުޅެ، 30 މެޗުން 24 ލަނޑު ޖަހާފައިވާ ފޯމު ރަނގަޅު ސްޓްރައިކަރެކެވެ. އަލްހިލާލަށް މި ކުޅުންތެރިޔާ ރަޖިސްޓްރީ ކުރެވޭނީ އެލެކްސާންޑަރ މިޓްރޮވިޗް ސްކޮޑުން އުނިކުރުމަށް ފަހުގައެވެ.

މިހާރު ޓީމުގެ ފަރިތަކުރުންތަކުގައި ބައިވެރިވެފައިވާ 34 އަހަރުގެ ސްޓްރައިކަރު ހަމްދުﷲ އަށް، ހުކުރު ދުވަހު ފްލޫމިނޭންސޭ އާ ދެކޮޅަށް ކުޅޭ މުހިންމު މެޗުގައި ކުޅުމުގެ ފުރުސަތު ލިބިދާނެއެވެ.