ދައުލަތުން ރައްޔިތުންނަށް ދޫކުރާ ލޯނަކީ ރައްޔިތުންނަށް އެއްވެސް ބުރައަކަށް ނުވެ ދައްކަން ފަސޭހަ ލޯނަކަށް ހެދުމަކީ ސަރުކާރުގެ އެންމެ ބޮޑު އަމާޒު ކަމުގައި މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. ޢަބްދުالله މުއްޠަލިބް ވިދާޅުވެއްޖެ އެވެ.

ވަޒީރު މިހެން ވިދާޅުވީ ރައްޔިތުންނާ ގާތުން ސަރުކާރުގެ ސިޔާސަތުތަކާއި މަސައްކަތްތައް ހިއްސާކުރުމުގެ މަޤްސަދުގައި ދިވެހިރާއްޖޭގެ އަޑުން ކުރިއަށްގެންދާ "އަހާށޭ ބުނާނަން" ޕްރޮގްރާމުގައެވެ.

ވަޒީރު ވިދާޅުވީ ދައުލަތުން ދޫކުރާ ލޯނުތައް ރައްޔިތުންނަށް ލުއިފަސޭހަ އަދި ދައްކަން ފަސޭހަ އެއްޗަކަށް ހެދުމަކީ ސަރުކާރުގެ އެންމެ ބޮޑު އަމާޒު ކަމުގައެވެ.އެ އުސޫލުން 5 އިންސައްތަ ޕްރޮފިޓްގައި ލޯނު ސްކީމްތައް ހިންގަވާ ކަންވެސް މިނިސްޓަރ ހާމަކުރެއްވިއެވެ.

ވަޒީރު ވިދާޅުވީ ބޯހިޔާވަހިކަމުގެ ދާއިރާއަށް ސަރުކާރުން ވަރަށް ބޮޑު އިސްކަމެއް ދެއްވާ ކަމަށެވެ. ސަރުކާރުގެ މަޤްސަދަކީ އިމާރާތްކޮށް، އެއަށް ސަބްސިޑައިޒްކޮށްގެން، ރައްޔިތުންނަށް ލުއި ފަސޭހަ އަދި ބަލައިގަނެވޭ އަގު ތަކެއްގައި ބޯހިޔާވަހިކަން ފޯރުކޮށްދިނުން ކަމަށެވެ.

ސަރުކާރުން އަންނަނީ ކުޑަ އިންޓަރެސްޓު ރޭޓެއްގައި ރައްޔިތުންނަށް ބޭނުންވާ އެކި ކަންކަމަށް ލޯނު ދޫކުރަމުންނެވެ. އެގޮތުން ގެދޮރު އެޅުމަށް މާލީ ދަތިކަން ކުރިމަތިވެފައިވާ ފަރާތްތަކަށް ހުޅުވާލި "ހިޔާވެހި" ލޯނު ސްކީމް ފާހަގަ ކޮށްލެވެ އެވެ. މި ލޯނަށް އެދި 2200 އަށްވުރެ ގިނަ މީހުން ހުށައަޅާފައިވެއެވެ.

ހިޔާވެހި ސްކީމަކީ މާލީ ދަތިކަމުގެ ސަބަބުން ގެދޮރު އެޅުމަށް ދަތިވެފައިވާ ފަރާތްތަކަށް ޙައްލެއް ހޯދައިދިނުމަށް މި ސަރުކާރުން ހުޅުވާލި ފުރުޞަތެކެވެ. މި ސްކީމް އިފްތިތާޙުކޮށްފައިވަނީ މިދިޔަ އަހަރުގެ ނޮވެންބަރު މަހުގެ 5 ވަނަ ދުވަހުއެވެ.

މިއީ 5އިންސައްތައިގެ ޕްރޮފިޓް މާޖިންއެއްގައި، 25 އަހަރުން އަނބުރާ ދައްކާގޮތަށް ދޫކުރާ ފައިނޭޝަލް ފެސިލިޓީއެކެވެ.