ހަނިމާދޫ ބައިނަލްއަގުވާމީ އެއާޕޯޓު ބޭރުގެ އެއްވެސް ފަރާތަކަށް ވިއްކަން އުޅޭ ކަމަށް ބުނެ ދެކެވޭ ވާހަކައަކީ "ބުހުތާނު ދޮގެއް"ގެ ގޮތުގައި، އިގްތިސާދާ ބެހޭ ވަޒީރު މުޙައްމަދު ސަޢީދު ސިފަކުރައްވައިފިއެވެ.

ރާއްޖޭގެ އުތުރުގެ މައި ހަބެއްގެ ގޮތުގައި ޒަމާނީ ފެންވަރަށް ތަރައްގީކުރާ ހަނިމާދޫ އެއާޕޯޓު، އިންޑިޔާގެ ވަރުގަދަ އަދާނީ ގްރޫޕަށް ވިއްކާލަން އުޅޭ ކަމަށް ބުނާ ވާހަކައެއް ފެންމަތިވީ، އެފަދަ ވާހަކައެއް ކުރީގެ ރައީސް އަބްދުﷲ ޔާމީން ދެއްކެވުމާ ގުޅިގެންނެވެ. ޕީއެންއެފްގެ ޖަލްސާއެއްގައި ޔާމީން ވިދާޅުވީ، ހަނިމާދޫ އެއާޕޯޓު ނިމުމަކާ ހިސާބަށް ގޮސްފައިވަނީ އިންޑިއާ ސަރުކާރުން ވަރަށް ބޮޑަށް އެހީވެގެން ކަމަށްވާއިރު، ދިވެހި ސަރުކާރުން ވިއްކާލަން ނިންމާ ތަންތަނުގެ ތެރޭގައި އެ އެއާޕޯޓް ހިމެނޭ ކަމަށެވެ.

އަދި އެކަން ކުރުމަށް، ރައީސް ޑރ. މުޙައްމަދު މުޢިއްޒު ސިންގަޕޫރަށް ކުރެއްވި ރަސްމީ ދަތުރުފުޅުގެ ތެރެއިން އަދާނީގެ ވެރިންނާ ބައްދަލުކުރެއްވި ކަމަށް ޔާމީން ތުހުމަތުކުރެއްވިއެވެ.

އެކަމާ ގުޅިގެން ވަޒީރު ސަޢީދު "އެކްސް"ގައި ކުރެއްވި ޕޯސްޓެއްގައި ވިދާޅުވީ، ހަނިމާދޫ އެއާޕޯޓު ބޭރުގެ ފަރާތަކަށް ވިއްކާލަން ނުވަތަ ކުއްޔަށްދޭން އުޅޭކަމަށްބުނެ ފަތުރަމުންދާ ވާހަކައާއި، މިކަމާއި ބެހޭ ގޮތުން ސިންގަޕޫރުގައި ބަޔަކާއި ބައްދަލުކުރި ކަމަށް ބުނެ ފަތުރަމުންދާ ވާހަކަތަކަކީ ބުހުތަނު ދޮގެއް ކަމަށެވެ.

އިންޑިޔާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ތަރައްގީކުރާ ހަނިމާދޫ އެއާޕޯޓަށް، 136 މިލިއަން ޑޮލަރު ނުވަތަ 2 ބިލިއަނެއްހާ ރުފިޔާ ހޭދަކުރެއެވެ. މި މަޝްރޫއުގެ ދަަށުން 2.46 ކިލޯމީޓަރުގެ ދިގު ރަންވޭއެއް ހިމެނޭއިރު، ސަރުކާރުން އެންމެ ފަހުން ބުނި ގޮތުގައި މި މަޝްރޫއުގެ 88 އިންސައްތަ މަސައްކަތް ވަނީ ނިމިފައެވެ.

އަދި މި އަހަރުގެ ސެޕްޓެމްބަރަށް މި އެއާޕޯޓު ހުޅުވުމަށް ސަރުކާރުން ވަނީ އަމާޒު ހިފާފައެވެ.