މި އަހަރުގެ ސެޕްޓެންބަރު މަހުގެ 18 އިން 21 އަށް ސްރީ ލަންކާގެ ވެރިރަށް ކޮލޮންބޯގައި ބޭއްވުމަށް ހަމަޖެހިފައިވާ 'އިންޑަސްޓްރީ އެކްސްޕޯ 2025' ގައި، ދިވެހި އުފެއްދުންތައް އެގްޒިބިޓްކޮށް، ގަނެވިއްކުމުގެ ފުރުޞަތު ދިވެހި ވިޔަފާރިވެރިންނަށް ހުޅުވިފައިވާކަމަށް އިކޮނޮމިކް މިނިސްޓްރީން ހާމަކޮށްފިއެވެ.

މި ފުރުޞަތަކީ ދިވެހިރާއްޖޭގެ ވިޔަފާރިތަކުން އުފައްދާ އުފެއްދުންތައް ބައިނަލްއަޤްވާމީ ފެންވަރެއްގައި އިޝްތިހާރުކޮށް މާކެޓްކުރުމަށް ލިބޭ މުހިންމު ފުރުޞަތެކެވެ.

Ad by Hajj Corporation

އިކޮނޮމިކް މިނިސްޓްރީން ހާމަކުރެއްވި ގޮތުގައި، މި މައުލޫމާތު އެ މިނިސްޓްރީއާ ހިއްސާކޮށްފައިވަނީ ދިވެހިރާއްޖޭގައި ހުންނަ ސްރީ ލަންކާގެ ހައިކޮމިޝަނުންނެވެ.

މި އެކްސްޕޯގައި ދިވެހި އުފެއްދުންތައް ދައްކާލުމުގެ އިތުރުން، އެ އުފެއްދުންތައް ބައިނަލްއަޤްވާމީ ގޮތުން ގަނެ ވިއްކުމުގެ ފުރުޞަތު ވެސް ލިބިގެންދާނެއެވެ. މިއީ ވިޔަފާރިތަކަށް އާ ބާޒާރުތައް ހުޅުވައިލެވޭނެ ރަނގަޅު މަންސައެކެވެ.

މިއެކްސްޕޯގައި ބައިވެރިވުމަކީ، ދިވެހިރާއްޖޭގެ ކުދި އަދި މެދުފަންތީގެ ވިޔަފާރިތަކުން އުފައްދާ ތަފާތު އުފެއްދުންތައް ބޭރުގެ މާކެޓްތަކަށް ތައާރަފްކޮށް، އާ ކަސްޓަމަރުން ހޯދައި، ވިޔަފާރީގެ ގުޅުންތައް ބަދަހިކުރުމަށް ލިބޭ ރަނގަޅު ފުރުޞަތެކެވެ. ޚާއްސަކޮށް، ދިވެހި އަތްތެރި މަސައްކަތާއި، މަސްވެރިކަމުގެ އުފެއްދުންތައް އަދި އެހެނިހެން ދިވެހި އުފެއްދުންތައް ބައިނަލްއަޤްވާމީ ދާއިރާގައި ދައްކާލުމަށް މިއީ ފަހިވާނެ މާހައުލެކެވެ.

މި އެކްސްޕޯގައި ބައިވެރިވުމަށް އެދޭ ފަރާތްތަކުން ރަޖިސްޓްރޭޝަން ފޯމާއި އެކްސްޕޯއާ ގުޅޭ އިތުރު މައުލޫމާތު، މި އެކްސްޕޯ އިންތިޒާމުކުރާ ފަރާތުގެ ވެބްސައިޓް (idb.gov.lk) އިން ލިބިވަޑައިގަންނަވާނެއެވެ. ބައިވެރިވުމަށް އެދި ރެޖިސްޓަރ ކުރައްވާނީ ވެސް މި ވެބްސައިޓު މެދުވެރިކޮށެވެ.

ދިވެހި ވިޔަފާރިވެރިންނަށް މި ފުރުޞަތުގެ ބޭނުން ހިފުމަށް އިކޮނޮމިކް މިނިސްޓްރީން ވަނީ ހިތްވަރުދީފައެވެ.