ކ. ކާށިދޫން މީހުން ދިރިއުޅުމަށްޓަކައި 410 ބަންޑާރަ ގޯތި ދޫކުރުމަށް ނިންމައިފިއެވެ.

އެރަށު ކައުންސިލުން ކުރި އިއުލާނެއްގައި ބުނީ، މިގޮތުން ދޫކުރުމަށް ހަމަޖެހިފައިވަނީ 2،000 އަކަފޫޓުގެ ގޯތިތަކެކެވެ.

ގޯތިތައް ދޫކުރުމަށް ހަމަޖެހިފައިވަނީ ދެ ކެޓަގަރީއަކަށް ބަހާލައިގެންނެވެ. މީގެ ތެރެއިން ކެޓަގަރީ އޭގެ ދަށުން 400 ގޯތި ދޫކުރެވޭނީ ކާށިދޫގެ ރަށްވެހިންނާއި، ކާށިދޫ ރަށްވެހިންނާ ކައިވެނިކޮށްގެން އެރަށުގައި ދިރިއުޅޭ މީހުންނަށާއި، ކާށިދޫއަށް ހިޖުރަކޮށް ރަށްވެހިކަން ބަދަލުކޮށްފައިވާ ފަރާތްތަކަށެވެ. އަދި ކެޓަގަރީ ބީގެ ދަށުން 10 ގޯތި ޚާއްޞަ ކުރެވިފައިވަނީ ނުކުޅެދުންތެރިކަން ހުންނަ ފަރާތްތަކަށެވެ.

ގޯއްޗަށް އެދި ހުށަހެޅުމުގެ ފުރުޞަތު 15 ޖުލައި 2025 އިން ފެށިގެން ހުޅުވާލެވޭނެ ކަމަށް ކައުންސިލުން މަޢުލޫމާތު ދީފައިވެއެވެ. އަދި ފޯމު ހުށަހެޅުމުގެ ސުންގަޑިއަކީ 14 އޮގަސްޓް 2025 ވާ ބުރާސްފަތި ދުވަހުގެ 13:00 ކަމަށް ވެސް ކައުންސިލުން ބުނެފައިވެއެވެ.

ގޯއްޗަށް އެދި ހުށަހަޅާ ފަރާތްތަކުން ފޯމާއެކު ހުށަހަޅަންޖެހޭ ލިޔެކިޔުންތަކުގެ ތެރޭގައި އެނެކްސް ޝީޓާއި، ޕޮއިންޓް ޝީޓާއި، ގޯތި ދޫކުރާ ސަރަޙައްދު ދައްކުވައިދޭ ޗާޓު ހިމެނެއެވެ. އަދި މީގެ އިތުރުން ބަންޑާރަ ނުވަތަ އަމިއްލަ ގޯއްޗެއްގައިވާ ނުއުފުލޭ މުދަލުން ލިބިފައިވާ ބިން ދޫކޮށްލުމަށް ވެވޭ އިޤުރާރު ވެސް ހުށަހަޅަންޖެހެއެވެ.

އިތުރު މަޢުލޫމާތު ހޯދުމަށް ކާށިދޫ ކައުންސިލްގެ ނަންބަރު 6645377 އަށް ގުޅުމަށް ކައުންސިލުން އަންގާފައިވެއެވެ.