ރާއްޖޭގެ މިނިވަންކަމަށް 60 އަހަރު ފުރުމާއި ގުޅިގެން ބާއްވަވާ ރަސްމީ ޖަލްސާގައި ބައިވެރިވެވަޑައިގަތުމުގެ ދައުވަތު ރައީސުލްޖުމްހޫރިއްޔާގެ މަޤާމު އަދާކުރައްވާފައިވާ ހުރިހާ ބޭފުޅުންނަށް އެރުވުމަށް ނިންމަވާފައިވާކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު ޢާދަމް ނަސީރު އިބްރާޙިމް ވިދާޅުވެއްޖެއެވެ.

ވަޒީރު ވިދާޅުވީ މިނިވަންދުވަހުގެ ރަސްމީ ޖަލްސާގައި ބައިވެރިވެވަޑައިގަތުމުގެ ދައުވަތު ކުރީގެ ހުރިހާ ރައީސުންނާއި ނައިބު ރައީސުންނަށް އަރުވަން ނިންމަވާފައިވާކަމަށެވެ.

Ad by Hajj Corporation

އަދި ޤައުމަށް ޚިދުމަތްކުރައްވާފައިވާ ބޭފުޅުންގެ އަގު ވަޒަންކުރެއްވުމަކީ ސަރުކާރުގެ ސިޔާސަތުކަމަށާއި، ކުރީގެ ރައީސުންނާއި، ކުރީގެ ނައިބު ރައީސުންނަށް ޙައްޤު އިޙްތިރާމާއި ޤަދަރުކުރުމަކީ ރައީސް ޑރ.މުޙައްމަދު މުޢިއްޒު ޤައުމަށް ގެންނަވަން ބޭނުންފުޅުވާ އަޚްލާޤީ ބަދަލުގެ އެއް ނަމޫނާކަމަށްވެސް ވަޒީރު ވިދާޅުވިއެވެ.

ދައުލަތުގެ މީޑިޔާއަށް މައުލޫމާތު ދެއްވަމުން ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު ޢާދަމް ނަސީރު އިބްރާޙިމް ވިދާޅުވީ މިނިވަން ދުވަހުގެ ރަސްމީ ޖަލްސާ ކުރިއަށް ގެންދިއުމަށް ނިންމަވާފައިވަނީ ދެ ބަޔަކަށް ބަހާލައިގެން ދެ ދުވަހަކުކަމަށެވެ. އެގޮތުން ޖަލްސާ އޮންނަނީ ޖުލައިމަހުގެ 27 އަދި 28 ވަނަ ދުވަހުގެ ހެނދުނު 9:00 ޖަހާއިރު ސޯޝަލް ސެންޓަރުގައިކަމަށްވެސް ވަޒީރު ވިދާޅުވިއެވެ.

މިިނިވަން ދުވަހުގެ ރަސްމީ ޖަލްސާގެ އިތުރުން، މިނިވަން ދުވަހު ބޭއްވެވުމަށް ހަމަޖެހިފައިވާ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް ހުޅުވުމުގެ ރަސްމިއްޔާތުގައި ބައިވެރިވެވަޑައިގަތުމުގެ ދައުވަތުވެސް ކުރީގެ ހުރިހާ ރައީސުންނަށް އަރުވަން އެމްއޭސީއެލްއިން ވަނީ ނިންމަވާފައެވެ.