މިހާތަނަށް 50 އަށްވުރެ ގިނަ ކުޅިވަރު ޕްރޮޖެކްޓްތައް ނިންމައި ރައްޔިތުންނާ ހަވާލުކޮށްފައިވާ ކަމަށާއި، މިއަހަރަކީ ކުޅިވަރުގެ ވުޒާރާއިން އެންމެ ގިނަ މަޝްރޫޢުތައް ނިންމާލެވޭނެ އަހަރު ކަމަށް  ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.

ޕީއެންސީ ހަރުގެ ޖަލްސާގައި ވާހަކަދައްކަވަމުން، މިނިސްޓަރު ރާފިއު ވިދާޅުވީ، ކުޅިވަރުގެ ވުޒާރާއިން ކުރާ މަސައްކަތްތައް ވީހާވެސް އަމާނާތްތެރިކަމާއެކު ދިވެހި ރައްޔިތުންނަށް ކޮށްދިނުމަށް މަސައްކަތް ކުރައްވަމުންދާ ކަމަށެވެ.

Ad by Hajj Corporation

"އަޅުގަނޑުމެންގެ މަސައްކަތުގައި އަޅުގަނޑުމެން އޮޅުވައެއްނުލާނެ. އަޅުގަނޑުމެން ދޮގެއް ނަހަދާނަން،" މިނިސްޓަރު ވިދާޅުވިއެވެ.

ކުޅިވަރުގެ ވުޒާރާއިން މިހާތަނަށް ނިންމާފައިވާ 50 އަށްވުރެ ގިނަ ޕްރޮޖެކްޓްތަކުގެ ތެރޭގައި ކުޅިވަރުގެ އެކި ވަސީލަތްތައް ހިމެނޭކަމަށް މިނިސްޓަރު ފާހަގަކުރެއްވިއެވެ.

ކުޅިވަރުގެ ދާއިރާ ކުރިއެރުވުމަށްތަކާ މިސަރުކާރުން ގިނަ މަސައްކަތްތަކެއް ކުރާކަން ފާހަގަކުރެވެއެވެ. ކުޅިވަރާ ބެހޭ ޤާނޫނުގެ އެއްވަނަ އިޞްލާޙު ގެނައުމުގެ ބިލު މިދިޔަ މެއި މަހު ރައީސް ވަނީ ތަސްދީޤްކުރައްވާފައެވެ. ކުޅިވަރު ޤާނޫނުގެ ސަބަބުން ދިވެހި ކުޅިވަރުން ފެނިގެންދާނީ ހެޔޮ ބަދަލެއްގެ ފެށުން ކަމަށް މިނިސްޓަރު ރާފިއު ކުރިން ވިދާޅުވެފައިވެއެވެ. ކުޅިވަރު ގާނޫނުގެ ދަށުން ހެދިގެންދާ ޤައުމީ ކުޅިވަރު ފަންޑަށް ޖަމާކުރެވޭ ފައިސާއިން، ފަންޑުގެ މަޤްޞަދުތައް ޙާޞިލުކުރުމަށްޓަކައި ފަންޑުން ކުރެވޭ ހޭދައިގެ މިންވަރު އިތުރުކުރުމަށްޓަކައި، ޤާނޫނު ހުއްދަކުރާ ގޮތުގެމަތިން އިންވެސްޓްކުރުން ހިމެނެއެވެ.