ގ. ގާރނެޓްގައި ދިރިއުޅޭ ޙަސަން ޔާމީން (30 އަހަރު) މިދިޔަ ޖުލައި 11 ވަނަ ދުވަހުގެ ރޭ 9:25 އެހައިކަށްހާއިރު ގެއިން ނުކުމެގެން ދިޔަފަހުން އާއިލާއަށް އެއްވެސް ޚަބަރެއް ނުވެ ގެއްލިފައިވާ ކަމަށް ފުލުހުންނަށް ރިޕޯޓުކުރި މައްސަލައާއި ގުޅިގެން އޭނާ ހޯދުމުގެ މަސައްކަތްކުރަމުންދާކަމަށް ފުލުހުންބުނެފިއެވެ.

ފުލުހުން ނެރުނު ބަޔާނެއްގައި ބުނީ ، މި މައްސަލަ ފުލުހުންނަށް ރިޕޯޓުކޮށްފައިވަނީ ޖުލައި 14 ވަނަ ދުވަހު ޙަސަން ޔާމީންގެ އާއިލާގެ ފަރާތުންކަމަށާއި މައްސަލަ ރިޕޯޓުކުރުމާއެކު، ގެއްލިގެން ހުށަހަޅާ މީހުންގެ މައުލޫމާތު ފޯމު ފުރިހަމަކޮށް، ފުލުހުންގެ ޚިދުމަތުގެ ގުޅުންހުރި ބަހާތަކަށާއި އެހެނިހެން މުއައްސަސާތަކަށް އެ މައުލޫމާތު ހިއްސާކޮށްފައިޥާނެކަމަށެވެ.

Ad by Hajj Corporation

އަދި މި މައްސަލައާ ގުޅިގެން ގިނަ އަދަދެއްގެ ސީސީޓީވީ ފުޓޭޖު ދިރާސާކުރުމުގެ މަސައްކަތް ކުރަމުންދާކަމަށާއި އާއިލާގެ އެއްބާރުލުމާއެކު އޭނާ ދިރިއުޅޭ ތަން ބަލައިފާސްކޮށްފައިވާކަމަށްވެސް އެވެ. ނަމަވެސް، ތުހުމަތުކުރެވޭ އެއްވެސް ކަމެއް ނުވަތަ ކުށުގެ އަމަލެއް ހިންގާފައިވާކަމުގެ އެއްވެސް ހެއްކެއް ފެނިފައެއް ނުވާކަމަށް ފުލުހުން ބުންޏެވެ.

ފުލުހުން ބުނީ ތަޙުޤީޤުތަކުން ދައްކާގޮތުގައި ޙަސަން ޔާމީން ޤައުމުން ބޭރަށް ގޮސްފައި ނުވާކަން ކަމާގުޅުންހުރި އިދާރާތަކުން ކަށަވަރުކޮށްދީފައިވާކަމަށެވެ. އަދި އޭނާ ހޯދުމަށް ފުލުހުންގެ ފަރާތުން ކުރެވެންހުރި އެންމެހައި މަސައްކަތްތައް މެދުނުކެނޑި ކުރިއަށްދާކަމަށް ފުލުހުން ބުންޏެވެ.

ޙަސަން ޔާމީންއާ ގުޅޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ ދިވެހި ފުލުހުންގެ ޚިދުމަތުގެ ހޮޓްލައިން ނަންބަރު 3322111 އަށް ނުވަތަ ހެންވޭރު ޕޮލިސް ސްޓޭޝަން ނަންބަރު 9400053 އަށް ގުޅުއްވައި އެ މައުލޫމާތު ހިއްސާކުރުމަށް ފުލުހުން އެދިފައިވެއެވެ.