ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، އިނގިރޭސިވިލާތަށް ކުރައްވާ ދަތުރުފުޅުގައި، ކޮމަންވެލްތުގެ ސެކްރެޓަރީ ޖެނެރަލް އޮނަރަބަލް ޝަރލީ އަޔޯކޯ ބޮޗްވޭއާ މިއަދު ބައްދަލުކުރައްވައިފިއެވެ.

މި ބައްދަލުކުރެއްވުމުގައި ކޮމަންވެލްތުގެ އެންމެ އިސްވެރިޔާ، ސެކްރެޓަރީ ޖެނެރަލް ޝާލީ އަޔޯކޯ ބޮޗްވޭ ވަނީ ދިވެހިރާއްޖެއަށް އެ ޖަމްޢިއްޔާއިން ފޯރުކޮށްދެމުންދާ އެހީތެރިކަން ކުރިއަށް އޮތްތަނުގައިވެސް ދެމިއޮންނާނެކަމުގެ ޔަގީންކަން ދެއްވާފައެވެ.

Ad by Hajj Corporation

މި މުހިންމު ބައްދަލުވުމުގައި، ސެކްރެޓަރީ ޖެނެރަލް ވަނީ އެކި ދާއިރާތަކުން ދިވެހިރާއްޖެއަށް ކޮމަންވެލްތުން ދެމުންގެންދާ އެހީތެރިކަން ކުރިމަގުގައިވެސް ދެމެހެއްޓޭނެކަން އަލުން ކަށަވަރުކޮށްދެއްވާފައެވެ.

ބައްދަލުވުމުގެ ތެރޭގައި، ރައީސުލްޖުމްހޫރިއްޔާ ވަނީ ބައިނަލްއަޤްވާމީ މައިދާނުގައި ކުދި ޖަޒީރާ ޤައުމުތަކުގެ ޙައްޤުތަކަށް ވަކާލާތުކުރުމުގައި ދިވެހިރާއްޖެއިން އަދާކުރަމުންދާ ނަމޫނާ ދައުރު ފާހަގަކުރައްވާފައެވެ. އަދި 2040 އަށް ދިވެހިރާއްޖެ ތަރައްޤީވެފައިވާ ޤައުމަކަށް ހެދުމުގެ ލަނޑުދަނޑި ޙާޞިލުކުރުމުގައި ކޮމަންވެލްތުގެ އެހީތެރިކަމުގެ މުހިންމުކަންވެސް ފާހަގަކުރެއްވިއެވެ.

ދެ ފަރާތުގެ މަޞްލަޙަތު އެކުލެވޭ އެތައް ކަމެއް މި ބައްދަލުވުމުގައި މަޝްވަރާކުރެވުނެވެ. މީގެ ތެރޭގައި ޑިމޮކްރަސީއާއި ރަނގަޅު ވެރިކަމުގެ އުޞޫލުތަކާއި، ވިޔަފާރިއާއި އިޤްތިޞާދީ ކުރިއެރުން، އަދި މަސްވެރިކަމާއި ފަތުރުވެރިކަން ދެމެހެއްޓެނިވި ގޮތެއްގައި ތަރައްޤީކުރުމާ ގުޅޭ ކަންކަން ހިމެނެއެވެ.

މި ބައްދަލުވުމަކީ ދިވެހިރާއްޖެއާއި ކޮމަންވެލްތާ ދެމެދު އޮތް ގުޅުން އިތުރަށް ވަރުގަދަކޮށް، ހަރުދަނާކުރުމަށް މަގުފަހިވި މުހިންމު ފުރުޞަތެކެވެ.