އިސްރާއީލުގެ ހަމަލާތަކުގައި ފަލަސްތީނުގެ 41 މީހުން ފަތިހުން ފެށިގެން ޣައްޒާގެ އެކި ކަންކޮޅުތަކުގައި ޝަހީދުވެފައިވާ ކަމަށް ސިއްޚީ މަސްދަރުތަކުން ރިޕޯޓުކޮށްފިއެވެ.

ހުކުރު ދުވަހު އެންމެ ފަހުން މަރުވި މީހުންގެ ތެރޭގައި ޣައްޒާގެ އިރުމަތީގެ ޓުފާ އަވަށަށް އިސްރާއީލުން ދިން ހަމަލާއެއްގައި ތިން މީހަކު ވަނީ ޝަހީދުވެފައެވެ. ޣައްޒާގެ އުތުރުގައި އޮންނަ ޖަބަލިއާ އަން-ނަޒްލާއަށް އިސްރާއީލުން ދިން ވައިގެ ހަމަލާއެއްގައި ވެސް ފަސް މީހަކު ވަނީ ޝަހީދުވެފަ އެވެ.

Ad by Hajj Corporation

މީގެ ކުރިން ވެސް އިސްރާއީލުން ވަނީ ޣައްޒާގެ ދެކުނުގެ އަލް-މަވާސީގައި ފަލަސްތީނުގެ މީހުން ދިރިއުޅެމުންދާ ޓެންޓުތަކަށް ހަމަލާދީ ބޮޑު އަލިފާނުގެ ހާދިސާއެއް ހިނގައި، ކުޑަކުދިންނާ އެކު ފަސް މީހަކު ޝަހީދުވެފަ އެވެ. އިޒްރޭލުން އަލްމަވާސީއަށް ވަނީ ތަކުރާރުކޮށް، ނުރައްކާތެރި ބަޑީގެ ހަމަލާތަކެއް ދީފައެވެ. ޝަހީދުވި މީހުންގެ ތެރޭގައި އެހީއަށް އެދުނު 10 މީހަކު ވެސް ހިމެނެ އެވެ.

އަލްޖަޒީރާގެ ނޫސްވެރިޔާ ހާނީ މަހްމޫދު ވިދާޅުވީ ޒަހަމްވި މީހުންގެ ތެރޭގައި ކުޑަކުދިން ވެސް ހިމެނޭ ކަމަށާއި އެ މީހުން ނާސިރު ހޮސްޕިޓަލަށް ބަދަލުކޮށްފައިވާ ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މިހާތަނަށް 58،667 މީހުން ޝަހީދުވެ 139،974 މީހުން ޒަޚަމްވެފައިވެއެވެ.