ހުސްވި ހަފުތާގައި އއ. މާޅޮހުގެ ގެއެއްގެ ތެރޭގައި މަރާލި އަބްދުއްރަޙްމާނު އާދަމްގެ ހަށިގަނޑު، ޕޯސްޓް މޯޓަމް ހެދުމަށް މިއަދު އިންޑިޔާއަށް ގެންގޮސްފިއެވެ.

އުމުރުން 65 އަހަރުގެ އަބްދުއްރަޙްމާނު މަރުވެފައި ވަނީ އޭނާ ދިރިއުޅޭ ގޭގައި ނިދާފައި އޮއްވައި، މީހަކު އޭނާގެ ބޮލަށް ދިން އަނިޔާތަކެއްގެ ސަބަބުންނެވެ. އަބްދުއްރަޙްމާނު މަރުވެފައިވަނީ އެ އަނިޔާތަަކަށްފަރުވާދިނުމަށް އެ ރަށު ސިއްޚީ މަރުކަޒަށް ގެންދިޔަ ފަހުންނެވެ. އެއީ މި މަހުގެ 12 ދުވަހުގެ ފަތިހުގެ ވަގުތެއްގައެވެ.

Ad by Hajj Corporation

އެމަރާ ގުޅިގެން އިތުރު ތަޙުލީލުތަކަށް ފުލުހުން އޭނާގެ ހަށިގަނޑު މާލެ ގެނެސްފައިވަނީ އޭގެ އަނެއް ދުވަހުއެވެ. ޕޯސްޓް މޯޓަމް ހެދުމަށް އެ ހަށިގަނޑު އިންޑިޔާގެ ޓްރެވެންޑްރަމްއަށް ފޮނުވާފައިވަނީ މިއަދުގެ ވަގުތެއްގައެވެ.

އަބްދުއްރަހްމާންގެ މަރުގެ މައްސަލާގައި ފުލުހުންގެ ޚާއްސަ ޓީމަކުން އެރަށުގައި ހަރަކާތްތެރިވަމުން އަންނައިރު،  އެ ޓީމުން ވަނީ އެ ރަށަށް އަރައި ފައިބާ މީހުން މޮނިޓާކޮށް، ރަށުގެ ރައްޔިތުންނާ ސުވާލު ކުރުމުގެ އިތުރުން ބައެއް ތަންތަން ބަލައި ފާސްކޮށްފައެވެ.

މިހާތަނަށް އެ މައްސަލައިގައި ފުލުހުން ހާމަކުރީ، އޭނާގެ އަންހެނުންގެ ފޯނު ހިފެހެއްޓި ވާހަކަ އެކަންޏެވެ.

އެ މައްސަލައިގައި މިހާތަނަށް ވެސް ޝައްކުކުރެވޭ ޤާތިލެއް ހުރިކަމުގެ މަޢުލޫމާތު ފުލުހުން ދީފައިނުވެއެވެ.