މިނިވަން ދުވަހުގެ ހަރަކާތްތަކާ ގުޅިގެން، މާލޭގެ ގްރީން ޒޯން ހިމެނޭހެން ބޮޑު ސަރަޙައްދަކުން، އެއްގަމު އުޅަނދުތައް ނެގުމަށް ފުލުހުން އަންގައިފިއެވެ. 

ވެހިކަލް ނެގުމަށް އަންގާފަވާ ސަރަޙައްދުގެ ތެރޭގައި ބޮޑުތަކުރުފާނު މަގު، ބީއެމްއެލްއިން ފެށިގެން ލޯކަލް މަރުކޭޓާ ހިސާބަށް ޕާކުކޮށްފަވާ ވެހިކަލްތައް ނަގަން ވަނީ އަންގާފައެވެ. އަދި އަމީރު އަޙުމަދު މަގާ، މެދުޒިޔާރަތް މަގާ، ރައްޔިތުންގެ މަޖިލިސް ވަށައިގެންވާ މަގުތައްވެސް ހިމެނެއެވެ. މީގެއިތުރުން ޗާންދަނީ މަގާ ލިލީ މަގުން ބައެއްވެސް ވަނީ ހިމަނާފައެވެ. 

ފުލުހުން ވިދާޅުވީ އެ ސަރަހައްދުތަކުގައި ޕާކްކޮށްފައިވާ އުޅަނދުތައް މާދަމާގެ 18:00 ގެ ކުރިން ނެގުމަށް އެދޭކަމަށެވެ. އަދި އޭގެ ފަހުން އެ ސަރަހައްދުތަކުގައި ނުނަގާ ހުންނަ އުޅަނދުތައް އެހެން ސަރަޙައްދަކަށް ބަދަލުކުރުމާއި، ގަވާއިދާ ޚިލާފަށް ޕާކްކޮށްފައިވާ އުޅަނދުތައް ޓޯވކުރުމުގެ މަސައްކަތް ފުލުހުން ކުރަމުންދާނެކަމަށް ވިދާޅުވިއެވެ.

Ad by Hajj Corporation

ފުލުހުން ވިދާޅުވީ މި ކަންކަމާ ގުޅިގެން ދިމާވެދާނެ ދަތިތަކަށް މައާފަށް އެދޭކަމަށާއި މިފަދަ ކަންކަމުގައި އާންމުންގެ ފަރާތުން ލިބޭ އެއްބާރުލުމަށް ޝުކުރު ދަންނަވާކަމަށެވެ.

ވެހިކަލްތައް ނެގުމަށް އަންގާފަވާ ސަރަޙައްދުތަކުގެ ޗާޓު، ފުލުހުންގެ ސޯޝަލް މީޑިއާ އެކައުންޓްތަކުގައި ވަނީ އާއްމުކޮށްފައެވެ.