ޕީއެސްޖީއާއި ޓޮޓެންހަމް ހޮޓްސްޕަރ އާ ދެމެދު ކުޅުނު ޔުއެފާ ސުޕަރ ކަޕް ފައިނަލލް މެޗުގެ ކުރިން، ޔުއޭފާއިން މެސެޖެއް ބޮޑު ބެނާއަކުން ހިއްސާކޮށްފިއެވެ. އެގޮތުން މިމެސެޖުގައިވަނީ ޣައްޒާއާ ގުޅޭގޮތުން "ކުޑަކުދިން މެރުން ހުއްޓާލާ، އާންމުން މެރުން ހުއްޓާލާ" މި މެސެޖް ލިޔެފައިވާ ބެނާއެއް ޔުއެފާއިން ދައްކައިފިއެވެ.

އަދި މިކަން ހިއްސާކުރުމަށް އެކެސްގައި (ކުރީގެ ޓްވިޓަރ) ގައި ޔުއެފާއިން ނެރުނު ބަޔާނެއްގައި ބުނެފައިވަނީ "މެސެޖް ވަރަށް ސާފު، ބެނާއެއް، ގޮވާލުމެއް" މިފަދައިންނެވެ. މެޗު ފެށުމުގެ ކުރިން، ހަނގުރާމައިގެ އަސަރު ކޮށްފައިވާ ސަރަހައްދުތަކުގެ ކުޑަކުދިން، އޭގެ ތެރޭގައި ޣައްޒާގެ ދެ ކުއްޖަކު ހިމެނޭ ގޮތަށް، މި ބެނަރު ހިފައިގެން ނުކުތެވެ.

Ad by Hajj Corporation

މި ހަރަކާތަކީ ޔުއެފާ ފައުންޑޭޝަން ފޮރ ޗިލްޑްރަންއިން އެކި ސަރަހައްދުތަކުގައި ހިނގަމުންދާ ހަނގުރާމަތަކުގެ އަސަރު ކުރާ ކުދިންނަށް އެހީތެރިވުމަށް އިޢުލާން ކުރި ޕްރޮގްރާމްގެ ބައެކެވެ. އަދި މިއީ "ފަލަސްތީނުގެ ޕެލޭ" ގެ ނަމުން މަޝްހޫރުވެފައިވާ ސުލައިމާން އަލް-އުބައިދުގެ ހަނދާނުގައި ޔުއެފާއިން ނެރުނު ބަޔާނުގައި، އޭނާ ޝަހީދުވި ގޮތާއި އިސްރާއީލްގެ ޢަމަލުތަކާ މެދު އެއްވެސް ވާހަކައެއް ނުހިމެނުމާ ގުޅިގެން ލިވަރޕޫލްގެ ތަރި މުހައްމަދު ސަލާހް މިދިޔަ ހަފްތާގައި މީސްމީޑިޔާގައި ޔުއޭފާ އަށް އަމާޒުކޮށް ސުވާލުދޫކޮށްލުމުން އުފެދުނު ފާޑުކިޔުން ތަކާއި ޕްރެޝަރަށްފަހު އައި ބަދަލެކެވެ.

ފާއިތުވި ހަފްތާގައި ޔުއެފާއިން އެކްސްގައި ނެރުނު ހަނދާނީ ބަޔާނުގައި ބުނެފައިވަނީ އަލް-އުބައިދު (ފަލަސްޠީން ޕެލޭ) އަކީ "އެންމެ އަނދިރި ވަގުތުތަކުގައިވެސް އެތައް ކުދިންނަކަށް އުއްމީދު ދިން ހުނަރުވެރިއެއް" ކަމަށެވެ. މި ބަޔާނާ ގުޅިގެން ސަލާހް ކުރި ޓްވީޓެއްގައި "އޭނާ މަރުވީ ކިހިނެއްތޯ، ކޮންތާކުތޯ، އަދި ކީއްވެތޯ އަހަމެންނަށް ކިޔައިދެވިދާނެތޯ؟" މިހެން ލިޔެފައިވެއެވެ.

ޕްރިމިއަރ ލީގުގެ ތާރީޚުގައި އެންމެ މޮޅު ކުޅުންތެރިންގެ ތެރޭގައި ހިމެނޭ މިސްރުގެ ތަރި ސަލާހް، ޣައްޒާގައި ހިނގަމުންދާ އިންސާނިއްޔަތާ ޚިލާފު ޢަމަލުތައް ހުއްޓުވުމަށާއި އިންސާނީ އެހީ ވެއްދުމަށް ގޮވާލާފައިވެއެވެ.