އެމްޑަބްލިއުއެސްސީން ހުޅުމާލޭގައި ބިނާ ކުރި 10،000 ޓަނުގެ ފެން ރައްކާކުރާ ތާނގީގެ ޢަމަލީ މަސައްކަތްތައް ނިންމައި، އެ ތާނގި ރަސްމީކޮށް ބޭނުންކުރަން ފަށައިފިއެވެ.

އެމްޑަބްލިއުއެސްސީގެ ހުޅުމާލެ އޮޕަރޭޝަން ސެންޓަރުގައި މިއަދު ބޭއްވި ޚާއްސަ ރަސްމިއްޔާތެއްގައި އެ ތާނގި ބޭނުންކުރުން އިފްތިތާޙްކޮށްދެއްވީ ޢިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބު އާއި އެ ކުންފުނީގެ މެނޭޖިން ޑިރެކްޓަރު އަބްދުލް މަތީން މުޙައްމަދުއެވެ.

Ad by Hajj Corporation

އެ ތާނގި އަކީ އެމްޑަބްލިއުއެސްސީގެ މުވައްޒަފުންގެ އަމިއްލަ މަސައްކަތުން ޤާއިމްކުރި ތާނގިއެވެ. މިއީ ރާއްޖޭގައި މިހާތަނަށް ބެހެއްޓުނު އެންމެ ބޮޑު ތާނގީއަށް ވާއިރު، 24 މީޓަރުގެ އުސް މި ތާނގީގެ ޢަމަލީ މަސައްކަތް ފަށާފައިވަނީ 2024 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ.

މި ތާނގިއާއެކު ހުޅުމާލޭގެ ފެން ރައްކާކުރެވޭ މިންވަރު 22،600 އަށް އިތުރުވާނެ ކަމަށް އެމްޑަބްލިއުއެސްސީން މައުލޫމާތުދެއެވެ. އަދި އެ ތާނގިއަކީ ހުޅުމާލޭގެ ފެން ރައްކާ ކުރާ މިންވަރަށް ލިބުނު 79 އިންސައްތައިގެ ކުރިއެރުމެއް ކަމަށާއި، އެ ތާނގިއާއެކު މާލޭ އަދި ހުޅުމާލޭގެ ފެން ރައްކާކުރެވޭ މިިންވަރު މުޅި ޖުމްލަ 46،000 ޓަނަށް އިތުރުވެފައިވާ ކަމަށް ވެސް އެމްޑަބްލިއުއެސްސީން މައުލޫމާތު ދެއެވެ.