ވިލާއަތުން ކާޑެއްދޫ އެއާޕޯޓު ނަގަން ބަދަލުގެ ގޮތުގައި 18.5 މިލިއަން ދެނީ
23 އޯގަސްޓު 2025 - 07:02

ގދ. ކާޑެއްދޫ އެއާޕޯޓު ދައުލަތައް ނެގުމުގެ ގޮތުން ވިލާ އެއާ ޕްރައިވެޓް ލިމިޓެޑް އަށް ބަދަލުގެ ގޮތުގައި 18.5 މިލިއަން ޑޮލަރު ދޭން ސަރުކާރުން ނިންމާފައިވާ ކަމަށް ވިލާ އެއާގެ ޗެއާމަން އަދި މާމިގިލީ ދާއިރާގެ މެންބަރު ގާސިމް އިބްރާހީމް ވިދާޅުވެއްޖެއެވެ.
ޕީއެންއެފުން ބޭއްވި ވޭކްއަޕް ޖަލްސާގައި ކުރީގެ ރައީސް އަބްދުﷲ ޔާމީން، ކާޑެއްދޫ އެއާޕޯޓާ ގުޅުވައި ދެއްކެވި ވާހަކަތައް ދޮގުކުރައްވާ ގާސިމް ވަނީ އެ އާޕޯޓު ދައުލަތަށް ދިނުމުގެ މުއާމަލާތާ ގުޅޭގޮތުން ރައީސް އޮފީހުން، ވިލާ އެއާ ކުންފުންޏާއި ކޮށްފައިވާ މުއާމަލާތުގެ ސިޓީއެއް އާންމުކޮށްފައެވެ.

Ad by Hajj Corporation
އެސިޓީން ހާމަވީ ކާޑެއްދޫ އެއާޕޯޓު ސަރުކާރަށް އަނބުރާ ހަވާލުކުރަން ވިލާ އެއާ ކުންފުންޏަށް ބަދަލުގެ ގޮތުގައި ދައުލަތުން 21 މިލިއަން ޑޮލަރު ދޭން އެކުންފުނިން އެދުނު ކަމެވެ. އެގޮތުން ވިލާ އެއާ އިން އެސިޓީގައި ބުނެފައިވަނީ ކާޑެއްދޫ އެއާޕޯޓުގެ ތަރައްގީއަށް ކުރެވޭ މަޝްރޫއުތަކަށް 100 މިލިއަން ޑޮލަރު އަރާކަމަށެވެ.
އެ ހުށަހެޅުމާ ގުޅިގެން ރައީސް އޮފީހުން ބެލި ބެލުމުން، ކާޑެއްދޫ އެއާޕޯޓުގެ އަގަކީ، 18.5 މިލިއަން ޑޮލަރު ކަމަށާއި އެއާޕޯޓު ތަރައްގީކުރަން ޖާމިނުކޮށް އެ ކުންފުންޏަށް އދ. އަތޮޅުން ދީފައިވާ ދެ ފަޅުގެ އަގަކީ 15 މިލިއަން ޑޮލަރުކަމާއި، އެއީ ޖުމްލަ 33.5 މިލިއަން ޑޮލަރުކަމަށް ސިޓީގައިވެއެވެ.
ދައުލަތަށް ކާޑެއްދޫ އެއާޕޯޓު އަނބުރާ ހޯދަން ވިލާ އެއާ ކުންފުންޏަށް ހުށަހެޅީ ދެ ގޮތެކެވެ.
ފުރަތަމަ ގޮތަކީ ސަރުކާރަށް އެއާޕޯޓު ހަވާލުކުރުމަށްޓަކައި، އެ އެއާޕޯޓަށް ވިލާ އެއާ ކުންފުނިން ކޮށްފައިވާ ހަރަދުގެ ބަދަލުގެ ގޮތުގައި 18 މިލިއަން އެމެރިކާ ޑޮލަރު، 18 މަސް ދުވަހަށް ބަހައިގެން އެ ކުންފުންޏަށް ދެއްކުން، ނުވަތަ ވިލާ ގްރޫޕުގައި ހިމެނޭ ކުންފުނިތަކުން ދައުލަތަށް ދައްކަން ޖެހޭ ޓެކްސް ފައިސާއިން 18 މަސް ދުވަހަށް ބަހައިގެން އެޖަސްޓްމަންޓު ހެދުމެވެ.
ރައީސް އޮފީހުގެ އެ ސިޓީގައިވާ ގޮތުން އެ ކަމަށް އެ ކުންފުނިން އެއްބަސްވާނަމަ ކާޑެއްދޫ އެއާޕޯޓުގެ ލީސް އެގްރިމަންޓު ބާތިލްކޮށް ކުންފުނިން އެއްބަސްވި ގޮތަށް ބަދަލު ދިނުމުގެ ކަންކަން ކުރިއަށް ގެންދަން އިކޮނިމް ކައުންސިލުން އޮތީ ހުއްދަ ވެސް ދީފައެވެ.
ގާސިމް އެކްސްގައި ކުރެއްވި ޕޯސްޓުގައި ވިދާޅުވީ ކުރީގެ ރައީސް ޔާމީން ހަދަވަނީ ދޮގު ކަމަށާއި، ކާޑެއްދޫ އެއާޕޯޓު ގެ ކަންކަން ހިނގާފައިވާގޮތް އޮޅުވާލައްވާގެން ފަތުރަމުންދާ ދޮގު ވާހަކަތައް ދިވެހި ގަބޫލު ނުކުރާނެ ކަމަށެވެ. އަދި ކުރީގެ ރައީސް ޔާމީން ވިދާޅުވާ 33 މިލިއަން ޑޮލަރު އެ ކުންފުންޏަށް ލިބިފައި ނުވާނެ ކަމަށެވެ.