ޔޫރަޕިއަން ފުޓްބޯޅަ ޖަމްއިއްޔާ (ޔުއެފާ) ގެ އެގްޒެކެޓިވް ކޮމިޓީގެ މެޖޯރިޓީ މެންބަރުން އިސްރާއީލު ބައިނަލްއަގުވާމީ މުބާރާތްތަކުން ސަސްޕެންޑް ކުރުމަށް ވޯޓު ނެގުމަށް ތައްޔާރުވެއްޖެއެވެ.

މި ފިޔަވަޅު އެޅިއްޖެނަމަ، އިސްރާއީލުގެ ގައުމީ ޓީމާއި ކްލަބް ޓީމްތަކަށް ބައިނަލްއަގުވާމީ މުބާރާތްތަކުގައި ބައިވެރިނުވެވޭނެއެވެ. މީގެ ތެރޭގައި އަންނަ އަހަރު ބޭއްވުމަށް ހަމަޖެހިފައިވާ ވޯލްޑް ކަޕްވެސް ހިމެނެއެވެ. އިސްރާއީލުގެ ފިރިހެނުންގެ ޓީމުން ވޯލްޑް ކަޕް ކޮލިފައިންގ މެޗުތައް ކުރިއަށް ގެންދިއުމަށް ހަމަޖެހިފައިވަނީ ދެ ހަފްތާ ފަހުން ނޯވޭ އަދި އިޓަލީއާ ދެކޮޅަށެވެ. މިގޮތަށް ފާސްވެއްޖެނަމަ ޔުއޭފާގެ ޤައުމުތަކުން ވޯލްޑް ކަޕް ކޮލިފައިންގައި އިސްރާއީލް އާއި ދެކޮޅަށް ނުކުޅޭނެއެވެ.

Ad by Hajj Corporation

ނަމަވެސް ފިފާއިން މިކަމަށް ތާއީދު ކުރާނެކަމާމެދު ސުވާލު އުފެދިފައިވެއެވެ. އެއީ ފިފާގެ ރައީސް ޖިއާނީ އިންފަންޓީނޯ އާއި އެމެރިކާގެ ރައީސް ޑޮނަލްޑް ޓްރަމްޕާ ދެމެދު އޮތް ގާތް ގުޅުމުގެ ސަބަބުންނެވެ. އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ އިސްރާއީލު ވޯލްޑް ކަޕުން ވަކިކުރަން ކުރާ މަސައްކަތްތައް ހުއްޓުވުމަށް މަސައްކަތް ކުރާނެ ކަމަށެވެ. އެމެރިކާގެ ރައީސް މިކަން ހުއްޓުވުމަށް ބޭނުންކުރާނެ އެންމެ ބޮޑު ހަތިޔާރަކީ އަންނަ އަހަރުގައި އެމެރިކާގައި ބާއްވަން ހަމަޖެހިފައިވާ ފީފާ ގެ އެންމެ ބޮޑު އިވެންޓް، ފީފާ ވޯލްޑްކަޕްއެވެ. އެގޮތުން ވޯލްޑްކަޕް ކުރިޔަށް ގެންދިޔުމުގައި ފީފާއިން އެމެރިކާ ސަރުކާރުގެ އެހީތެރިކަން ބޭނުންވާނެއެވެ. އެހެންކަމުން މިފަދަ ބޮޑު އިވެންޓަކަށް ފީފާއިން ކުރިމަތިލާއިރު، އެމެރިކާގެ ރައީސްގެފިއްތުންތަކާއި ދެކޮޅަށް މިފަދަ ފިޔަވަޅެއް ފީފާ އިން އެޅުމަކީ ދުރުަކަމެކެވެ.

ޣައްޒާގައި އިސްރާއީލުން ހިންގަމުންދާ އަސްކަރީ ހަމަލާތަކުގެ ސަބަބުން އިންސާނީ ގޮތުން ކުރިމަތިވަމުންދާ ގެއްލުންތަކާ ގުޅިގެން އިސްރާއީލު ފުޓްބޯޅައިންނާއި އެހެނިހެން ކުޅިވަރުތަކުން ވަކިކުރުމަށް ގޮވާލުންތައް އިތުރުވެފައިވެއެވެ. ސްޕެއިންގެ ބޮޑުވަޒީރު ޕެޑްރޯ ސާންޗެޒް ވަނީ، ރަޝިއާއަށް ދިން އަދަބު ފަދައިން އިސްރާއީލުވެސް ބައިނަލްއަގުވާމީ ކުޅިވަރު މުބާރާތްތަކުން ވަކިކުރަންޖެހޭ ކަމަށް ބުނެފައެވެ.

އިސްރާއީލުގެ ކުޅިވަރާއި ސަގާފަތާ ބެހޭ ވަޒީރު މިކީ ޒޮހަރު، ބޮޑުވަޒީރު ބެންޖަމިން ނެތަންޔާހޫ އަދި އިސްރާއީލު ފުޓްބޯޅަ އެސޯސިއޭޝަންގެ ވެރިޔާ މޮޝޭ ޒުއާރެސް ވަނީ މި މައްސަލައާ ގުޅިގެން ޔުއެފާއާއެކު މަޝްވަރާތައް ކުރަމުންދާ ކަމަށް ބުނެފައެވެ.