ފަތުރުވެރިކަމާ ބެހޭ ވަޒީރު އިބްރާހިމް ފައިސަލް މާލެއިން ބިމެއް ގަނެފައިވާކަމަށްބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތައް ފައިސަލް ދޮގުކުރައްވައިފިއެވެ.

ޕީޕަލްސް ނޭޝަނަލް ފްރަންޓް( ޕީއެންއެފް) ގެ ޖަލްސާއެއްގައި ވާހަކަފުޅު ދައްކަވަމުން ކުރީގެ ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެފައިވަނީ ފައިސަލްގެ އިތުރުން އެމަނިކުފާނުގެ ބައްޕާފުޅު އަދި ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲ އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ފަޒުލް ރަޝީދުގެ މައްޗަށްވެސް ކޮރަޕްޝަނުގެ ތުހުމަތުތަކެއްކޮށްފައެވެ.

އެގޮތުން ވަޒީރު ފައިސަލް މާލެއިން ބިމެއް ގަނެފައިވާކަމަށް ބުނެ ރައީސް ޔާމީންވަނީ ހެއްކެއްނެތި ވާހަކަފުޅުތަކެއް ދައްކަވާފައެވެ.

ރައީސް ޔާމީންގެ ވާހަކަތަކަށް ރައްދުދެއްވައި ފައިސަލް ވިދާޅުވީ މާލެއިން ބިމެއް ގަތްކަމަށް ބުނެ ރައީސް ޔާމީން ދައްކަމުން ގެންދާ ވާހަކައަކީ ކަނޑައެޅިގެން ރޯ ބުހުތާނު ދޮގު ވާހަކަތަކެއްކަމަށެވެ.

އެ ފަދަ ދޮގުވާހަކަތައް ދެއްކުން ހުއްޓާލެއްވުމަށާއި ރައްޔިތުންގެ މެދުގައި ފިތުނަ ފަސާދަ އުފައްދުމަށް މަސައްކަތް ނުކުރެއްވުމަށް ވަޒީރުވަނީ ރައީސް ޔާމީނަށް ނަސޭހަތްތެރިވެފައެވެ.

މިފަހުން އިދިކޮޅު އެމްޑީޕީއާއި ޕީއެންއެފްއިން އަންނަނީ ސަރުކާރުގެ އިސްވެރިންގެ އަގުވައްޓާލުމަށް އެބޭފުޅުންގެ އިސްތަށިފުޅުގައި ހެއްކަކާ ނުލައި ބޮޑެތި ތުހުމަތުތައް އަޅުވަމުންކަމަށް ސަރުކާރުން ބުނެއެވެ.