މުޅި މިދިޔަ އަހަރު ރާއްޖެއަށް ޒިޔާރަތްކުރި މިންވަރަށް، މި އަހަރުގެ މިހާތަނަށް ރާއްޖެއަށް ޒިޔާރަތްކޮށްފައިވާ ކަމުގައި ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ.

ވަޒީރު "އެކްސް"ގައި ކުރެއްވި ޕޯސްޓެއްގައި ވިދާޅުވީ، މުޅި މިދިޔަ އަހަރު ރާއްޖެއަށް ޒިޔާރަތްކުރި މިންވަރަށް މި އަހަރުގެ މިހާތަނަށް ރާއްޖެއަށް ފަތުރުވެރިން ޒިޔާރަތްކުރުމަކީ ލިބުނު ބޮޑު ފަޚްރެއް ކަމަށާއި، އެ ކާމިޔާބުން ދައްކުވައިދެނީ ފަތުރުވެރިކަމުގެ ދާއިރާގެ ފަރާތްތަކުގެ މަސައްކަތްތަކާއި، ފަތުރުވެރިންގެ މެދުގައި ރާއްޖެ މަގުބޫލު މިންވަރު ކަމަށެވެ.

އަދި މި އަހަރުގެ ޓާގެޓުކަމުގައިވާ ދެ މިލިއަން ފަތުރުވެރިންގެ އަމާޒު ހާސިލުކުރެވޭނެ ކަމުގެ ޔަގީންކަން އެބައޮތް ކަމުގައި ވެސް ވަޒީރު ވިދާޅުވިއެވެ.

ވަޒީރު އެފަދައިން ވިދާޅުވިއިރު، އިމިގްރޭޝަނުގެ ތަފާސް ހިސާބުތައް ދައްކާ ގޮތުގައި މިއަދާ ހަމައަށް ރާއްޖެއަށް ވަނީ 1.87 މިލިއަން ފަތުރުވެރިން ޒިޔާރަތްކޮށްފައެވެ. އެގޮތުން މި އަހަރުގެ މިހާތަނަށް އެންމެ ގިނައިން ރާއްޖެއަށް އައީ ޗައިނާގެ ފަތުރުވެރިންނެވެ. އެގޮތުން ޗައިނާ އަދި ދެވަނައިގައި އޮތް ރަޝިޔާ އިން، ކޮންމެ ގައުމަކުން ދެ ލައްކަ ފަތުރުވެރިން ވަނީ ރާއްޖެއަށް ޒިޔާރަތްކޮށްފައެވެ.