ގިރާވަރުފަޅުގެ އައު ލޭންޑް ޔޫސް ޕްލޭނެއް ތައްޔާރުކޮށް، އެ ޕްލޭނުގެ ދަށުން ގޯތި ލިބުނު ސަރަހައްދުތަކަށް ބަދަލު އައިސްފައިވާތީ، ގޯތީގެ އައު ލޮޓް ނަންބަރުތައް ކަނޑައެޅުމަށްޓަކައި ގުރު ނެގުން އަންނަ ހޮނިހިރު ދުވަހު ބޭއްވުމަށް އިމާރާތްކުރުމާއި ގެދޮރުވެރިކަމާއި ބިނާރާބެހޭ ވުޒާރާއިން ނިންމައިފިއެވެ.

މި ގުރުއަތުލުން ކުރިއަށްދާނީ އެދުވަހުގެ ހެނދުނު 09:30 ގައި ސޯޝަލް ސެންޓަރުގެ ހޯލުގައެވެ.

Ad by Hajj Corporation

ގެދޮރުވެރިކަމާ ބެހޭ ވުޒާރާއިން މިގޮތަށް ނިންމާފައިވަނީ ކުރީގެ ލޭންޑް ޔޫސް ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ޖުމްލަ 4072 ގޯތި ހިމެނޭހެން އައު ޕްލޭނެއް އެކުލަވާލުމާ ގުޅިގެންނެވެ. މި މަހުގެ 26 ވަނަ ދުވަހު ގެޒެޓްކޮށްފައިވާ މި ޕްލޭނުގެ ސަބަބުން "ބިންވެރިޔާ" ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަހައްދުތަކަށް ބަދަލު އަންނާނެއެވެ.

ގިރާވަރުފަޅުން ދޫކުރާ ގޯތީގެ ތަފްސީލު:

• 1250 އަކަފޫޓުގެ 2603 ގޯތި
• 1650 އަކަފޫޓުގެ 1214 ގޯތި
• 2050 އަކަފޫޓުގެ 254 ގޯތި
• 2450 އަކަފޫޓުގެ 01 ގޯތި

ގުރުއަތުލުމުގެ ކަންކަން ކުރިއަށް ގެންދާނީ އެ ވުޒާރާގެ މުވައްޒަފުންނެވެ. ކޮންމެ ޕްލޮޓަކަށް އެއް ފަރާތަކަށް ގުރުއަތުލާ ސަރަހައްދަށް ވަދެވޭނެއެވެ. ގޯތީގެ ވެރިފަރާތުގެ ބަދަލުގައި އެހެން މީހަކު ހާޒިރުވާނަމަ، ވެރިފަރާތުގެ އައިޑީ ކާޑު ކޮޕީއާއި ބަދަލުގައި ހާޒިރުވާ ފަރާތުގެ އައިޑީ ކާޑު ކޮޕީގެ އިތުރުން އެކަން އަންގައިދޭ ލިޔުމެއް ގެންނަން ޖެހޭނެއެވެ.

ގުރުއަތުލުން ކުރިއަށްދާއިރު، ގޯތި ލިބިފައިވާ ފަރާތަށް ހަމަޖެހޭ ޕްލޮޓް "ހިޔާވެހި" ޕޯޓަލްއިން ވަގުތުން ފެންނާނެ ކަމަށާއި، އެސްއެމްއެސްގެ ޒަރިއްޔާއިން ވެސް އެ މައުލޫމާތު ހިއްސާކުރާނެ ކަމަށް ވުޒާރާއިން ބުނެއެވެ. މި ހަރަކާތް ޕީއެސްއެމް މެދުވެރިކޮށް ވަގުތުން ދެއްކުމަށް ވެސް ވަނީ ހަމަޖެހިފައެވެ. ގުރުއަތު ނިމުމުން ގޯތި ހަވާލުކުރުމުގެ އެއްބަސްވުމުގައި ސޮއިކުރުމާއި ރަޖިސްޓަރީ ހަވާލުކުރުމުގެ ކަންކަން ކުރިއަށްދާނެ ގޮތް ފަހުން އިއުލާން ކުރާނެއެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ ކުރިން ވިދާޅުވެފައިވަނީ މާލެ ސަރަހައްދުގެ ބިންހިއްކުމުގެ މަޝްރޫއުތަކުގެ ތެރެއިން އެންމެ އަވަހަށް ނިމޭނީ ގިރާވަރުފަޅުގެ މަސައްކަތް ކަމަށެވެ. ގިރާވަރުފަޅުން ޖުމްލަ 160 ހެކްޓަރު ހިއްކުމަށް ވަނީ ހަމަޖެހިފައެވެ.