ކުރިއަށް އޮތް ދެ ދުވަހު ރާއްޖޭގެ ޖައްވުގެ ސަރަހައްދުގައި ވައި ނުސާފުވެފައިވާތީ ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އެދިއްޖެއެވެ.

އެޗްޕީއޭއިން ބުނީ ރާއްޖޭގެ މޫސުމާއި ބެހޭ ގައުމީ އިދާރާ (މެޓް) އިން ތަަފާސްހިސާބުތަކުން ދައްކާގޮތުން ރާއްޖޭގެ ސަރަހައްދުތަކަށް، ހާއްސކަޮށް މެދުރާއްޖެތޭރެ އަތޮޅުކަަަށް ދުންފަހުގެ އަަސަރު ވަަރަށް ބޮޑަށް ކުރަމުންދާ ކަމަށެވެ. އަދި ކުރިއަށް އޮތް ދެ ދުވަހުވެސް ދުންފަހުގެ އަސަރު ރާއްޖޭގައި ހުންނާނެ ކަމަށް ބެލެވޭ ކަމަށް އެޗްޕީއޭއިން ބުންޏެވެ.

Ad by Hajj Corporation

މިކަމާ ގުޅިގެން ރައްކާތެރިކަމުގެ ފިޔަވަޅު އެޅުމަށް ހާއްސަ ސަމާލުކަމެއް ދިނުމަށް އެޗްޕީއޭއިން ވަނީ އެދިފައެވެ.

އެގޮތުން ފުއްޕާމޭގެ ބަލިތަކާއި ހިތުގެ ބަލި އަދި އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުމަށް އިލްތިމާސްކޮށްފައިވެއެވެ.

ބޭރަށް ނުކުންނަން ޖެހޭ ހާލަތްތަކުގައި ރައްކާތެރިކަމަށް މާސްކް އެޅުމަށާއި ގޭގެ ދޮރުތައް ލައްޕާގައި ބެހެއްޓުމަށް އެދިފައިވެއެވެ.

ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަނުކުރުމަށާއި ތުއްތު ކުދިން ބޭރަށް ނުނެރުމަށް ވެސް އެޗްޕީއޭއިން އިލްތިމާސްކޮށްފައިވެއެވެ.

އެޗްޕީއޭއިން ވަނީ ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންތައްތައް މަޑުޖައްސާލުމަށް ވެސް އިރުޝާދުދީފައެވެ.