އީރާނުގެ މެދުތެރޭގައި ހުރި ކެންސަރު ބޭސް އުފައްދާ އެންމެ ބޮޑު އެއް ކާރުޚާނާއަށް އެމެރިކާ އާއި އިސްރާއީލުގެ އަސްކަރިއްޔާއިން ވައިގެ ވަރުގަދަ ހަމަލާތަކެއް ދީފި ކަމަށް އީރާނުން ބުނެފިއެވެ.

މާރިޗު 31 ގެ ހެނދުނުގެ ވަގުތެއްގައި ދިން މި ހަމަލާތަކަކީ އީރާނުގެ މަދަނީ އުމްރާނީ ވަސީލަތްތަކަށް އަމާޒުކޮށް ދިން ހަމަލާތަކެއް ކަމަށް އެ ގައުމުގެ އޮފިޝަލުން ވަނީ ސިފަކުރައްވާފައެވެ.

Ad by Hajj Corporation

އީރާނުގެ ހެލްތު މިނިސްޓްރީން ހާމަކުރި ގޮތުގައި، މި ހަމަލާ އަމާޒުވެފައިވަނީ ދައުލަތުގެ ސޯޝަލް ސެކިއުރިޓީ އިންވެސްޓްމަންޓް ކޮމްޕެނީ (ޝަސްތާ) ގެ ދަށުން ހިންގާ ބޭސް އުފައްދާ ކާރުޚާނާއަށެވެ. މި ހަމަލާގެ ސަބަބުން ކެންސަރަށް ފަރުވާކުރާ ބޭހާއި، ހޭނައްތާ ބޭހުގެ އިތުރުން އޮޕަރޭޝަންތަކަށް ބޭނުންވާ މުހިންމު ބޭސްތައް އުފައްދާ ޚާއްސަ ޕްރޮޑަކްޝަން ލައިންތަކަށް ވަނީ ބޮޑެތި ގެއްލުންތަކެއް ލިބި، ބައެއް ބައިތައް އެއްކޮށް ސުންނާފަތިވެފައެވެ.

ޕެންޓަގަން އާއި އިސްރާއީލް ޑިފެންސް ފޯސް (އައި.ޑީ.އެފް) އިން ބުނަމުންދަނީ އެފަރާތްތަކުގެ ހަމަލާތައް އަމާޒުކުރަނީ ކޮމާންޑް އެންޑް ކޮންޓްރޯލް ސެންޓަރުތަކަށާއި، މިސައިލް އުފައްދާ ތަންތަނުގެ އިތުރުން ނިއުކްލިއާ މަރުކަޒުތަކަށް ކަމަށެވެ. ބޭސް ކާރުޚާނާއަށް ދިން ހަމަލާއާ ގުޅޭގޮތުން ވަކި އެއްޗެއް ބުނެފައި ނުވި ނަމަވެސް، މީގެ ކުރިން އަސްކަރީ ތަރުޖަމާނުން ވަނީ އީރާނުގެ ރިވޮލިއުޝަނަރީ ގާޑްސް އިން މިސައިލްގެ ބައިތައް ފޮރުވުމަށް ސިނާއީ ގުދަންތައް ބޭނުންކުރާ ކަމަށް ތުހުމަތުކޮށްފައެވެ.

މި ހަމަލާ ދީފައިވަނީ އީރާނުގެ މަދަނީ އުމްރާނީ ވަސީލަތްތައް ކަމަށްވާ ކަރަންޓާއި ފެން އުފައްދާ މަރުކަޒުތައް "ފުނޑުފުނޑުކޮށްލާނެ" ކަމަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވިތާ އެއްދުވަސް ފަހުންނެވެ. ބޭސް ކާރުޚާނާގެ އިތުރުން، ގޭޝްމް އައިލެންޑްގައި ހުރި ފެން ސާފުކުރާ ޕްލާންޓަކަށް ވެސް ހަމަލާދީ ގެއްލުން ދީފައިވާކަން މިހާރު ވަނީ ކަށަވަރުވެފައެވެ.

ދުނިޔޭގެ ސިއްހީ މާހިރުން މީގެ ކުރިން ވެސް ވަނީ އީރާނަށް ބޭސް އެތެރެކުރުމުގައި ހުރި ހުރަސްތަކުގެ ސަބަބުން ބޮޑު ސިއްހީ ކާރިސާއެއް ކުރިމަތިވެދާނެ ކަމުގެ އިންޒާރު ދީފައެވެ. ޚާއްސަކޮށް އިންސިއުލިން އާއި ކީމޯތެރަޕީ ބޭސް ފަދަ ތަކެތި ހުސްވުމުގެ ބިރު އޮތްއިރު، ގައުމުގެ އެތެރޭގައި މިފަދަ ބޭސްތައް އުފައްދާ މައިގަނޑު ވަސީލަތްތަކަށް ހަމަލާދިނުމުން، އާންމު ރައްޔިތުންނަށް ބޭސް ލިބުން ދަތިވެ، ހާލަތު އިތުރަށް ގޯސްވާނެ ކަމަށް ބެލެވެއެވެ.

މި ހަމަލާއާ ގުޅިގެން ބައިނަލްއަގުވާމީ މުޖުތަމައުގެ ކަންބޮޑުވުން އުފެދިފައިވާއިރު، މިއީ އިންސާނީ އެހީތެރިކަމާއި ސިއްހީ ޚިދުމަތްތަކަށް ހުރަސްއެޅޭ ފަދަ އަމަލެއްގެ ގޮތުގައި ގިނަ ފަރާތްތަކަކުން ދަނީ ސިފަކުރަމުންނެވެ.