އިނގިރޭސިވިލާތަށް އެކްސްޕޯޓްކުރާ ދިވެހި މަހުގެ އުފެއްދުންތަކުން ނަގާ ޓެރިފް ކަނޑާލުމާއެކު، މާކެޓްގެ ތެރެއަށް ދިވެހި އަމިއްލަ ކުންފުނިތައް ވަންނާނެކަމުގެ ފުރިހަމަ ޔަގީންކަން އެބައޮތްކަމަށް ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް ވިދާޅުވެއްޖެއެވެ.

ތަރުޖަމާނު މިހެން ވިދާޅުވީ "ޕްރެސަރ ވިތު ދަ ސްޕޮކްސް" ސިލްސިލާގެ ދަށުން މިއަދު ބޭއްވި މިސިލްސިލާގެ 4 ވަނަ ބައްދަލުކުރެއްވުމުގައެވެ.

Ad by Hajj Corporation

އިނގިރޭސިވިލާތަށް އެކްސްޕޯޓްކުރާ ދިވެހި މަހުގެ އުފެއްދުންތަކުން މިހާރު ނަގަމުންދާ 20 އިންސައްތައިގެ ޓެރިފް، 2026 މޭ 20 އިން ފެށިގެން ދެ އަހަރު ދުވަހުގެ މުއްދަތަށް ކަނޑާލުމަށް ވަނީ ނިންމާފައެވެ. މި މުހިންމު ލުޔަކީ ރައީސުލްޖުމްހޫރިއްޔާ އިނގިރޭސި ސަރުކާރާއެކު ކުރެއްވި މުހިންމު މަޝްވަރާތަކުގެ ނަތީޖާއެއްކަން ތަރުޖަމާނު ފާހަގަކުރެއްވިއެވެ.

މި ބަދަލާއެކު ރާއްޖެއިން އިނގިރޭސިވިލާތަށް މަސް އެކްސްޕޯޓްކުރާ މިންވަރު 25 މިލިއަން ޑޮލަރުން 50 މިލިއަން ޑޮލަރަށް އިތުރުވާނެ ކަމަށް ސަރުކާރުން އުއްމީދުކުރެއެވެ.

ތަރުޖަމާނު ވިދާޅުވި ގޮތުގައި، މި ޙާލަތުގައި ސަރުކާރުން ބަރޯސާވާނީ ހަމައެކަނި ދައުލަތުގެ ކުންފުންޏަށް ނޫން ކަމަށާއި، އަމިއްލަ ކުންފުނިތަކުގެ ދައުރު މި ސިނާއަތުގައި ބޮޑުވެގެންދާނެއެވެ.

މިހާރު އިނގިރޭސިވިލާތަށް ކަޅުބިލަމަސް އެކްސްޕޯޓްކުރާ ޤައުމުތަކުގެ ތެރެއިން ރާއްޖެ އޮތީ 9 ވަނައިގައެވެ. ނަމަވެސް، ޓެރިފް ކަނޑާލުމުން ލިބޭ ފުރުޞަތުގެ ބޭނުން ހިފައި، ކުރިއަށް އޮތް ދެ އަހަރުގެ ތެރޭގައި އެކްސްޕޯޓްގެ އަދަދު ދެގުނަވެގެންދިއުމަކީ ސަރުކާރުގެ ބޮޑު އަމާޒެކެވެ.