ސޯޝަލް މީޑިއާގައި ވެސް އެންމެންގެ މަސްލަހަތު ހިމާޔަތްވާންޖެހޭ ކަމަށާއި, މީޑިއާގެ މިނިވަންކަމަށް އެއް އިރެއްގައި ވެސް ހުރަސް އަޅުއްވާފައި ނުވާނެކަމަށް ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެއެވެ.

ނާޒިމް މިހެން ވިދާޅުވީ، އޮންލައިން ނޫސް ''ސަން އޮންލައިން" އަށް އޭނާ ދެއްވި އިންޓަވިއެއްގައި މީޑިއާ އާއި އިންޓަނެޓް ރެގިއުލޭޓްކުރުމަށް ސަރުކާރުން ބިލެއް ހުށަހަޅުއްވާނެ ކަމަށް ވިދާޅުވުމުން، އާންމުންގެ ތެރޭ އޮޅުން އަރާގޮތަށް ބައެއް ފަރާތްތަކުން ޚަބަރު ފަތުރާތީ، އެކަން އޮޅުން ފިލުވައި ދިނުމަށް ނެރުނު ބަޔާނެއްގައެވެ.

Ad by Hajj Corporation

އެ ބަޔާނުގައި އޭނާ ވިދާޅުވެފައި ވަނީ މީޑިއާގެ މިނިވަންކަމަށް އެއްވެސް އިރެއްގައި ހުރަސް ނާޅުއްވާ ކަމަށެވެ.

"އަޅުގަނޑަކީ އެއްވެސް ޒަމާނެއްގައި މިނިވަން މީޑިއާއާ ދެކޮޅު ފަރާތެއް ނޫނެވެ. އަދި މީޑިއާގެ މިނިވަންކަމަށް ހުރަސްއަޅާނެ މީހެއް ނޫނެވެ. އަދި އެފަދަ ކަމަކަށް ދުވަހަކުވެސް ތާއީދުކުރާނެ މީހެއް ނޫނެވެ..،" ނާޒިމްގެ ބަޔާނުގައި ވިދާޅުވިއެވެ.

މީޑިއާ ރެގިއުލޭޓްކުރާ މުއައްސަސާތައް އެންމެ ފުރިހަމައަށް ނުހިނގާކަމަށް ފާހަގަކުރަށްވައި ނާޒިމް ވިދާޅުވެފައި ވަނީ ސޯޝަލް މީޑިއާ ރެގިއުލޭޓްކުރުމަކީ މުހިންމުކަމެއް ކަމަށާއި، ނަމަވެސް އެއީ މީޑިއާގެ މިނިވަންކަން ހަނިކުރުމެއް ނޫން ކަމަށް ވިދާޅުވިއެވެ.

އިންޓަނެޓް ރެގިއުލޭޓްކުރުމަށް ގާނޫނީ އޮނިގަނޑެއް ބޭނުންވާކަމަށް ވެސް ނާޒިމް ވަނީ ވިދާޅުވެފައެވެ.

މިއަދު ރައީސް އޮފީހުން ބުނީނޫސްވެރިކަމާ އިންޓަނެޓް ރެގިއުލޭޓުކުރަން ބިލެއް ތައާރަފުކުރަން ސަރުކާރުން މަސެއްކަތް ނުކުރާ ކަމަށެވެ. ސަރުކާރުގެ ލެޖިސްލޭޓިވް އެޖެންޑާގަވެސް އެފަދަ ބިލެއް ހިމެނިފައިނުވާނެ ކަމަށާއި، ކުރިއަށް އޮތްތަނުގައި ވެސް އެފަދަ ބިލެއް ތައާރަފް ކުރުމުގެ ވިސްނުމެއް ވެސް ނެތް ކަމަށް ވެސް ސަރުކާރުން މިއަދު ބުނެފަވެއެވެ.