ޗެމްޕިއަންސް ލީގު ނިމުމާއެކު، ޔުއޭފާގެ ކްލަބް ކޮއެފިޝަންޓް ރޭންކިންގ އާކޮށް އާންމުކޮށްފިއެވެ. މި ރޭންކިންގގައި ސްޕެއިންގެ ދެ ކްލަބެއް ޓޮޕް 10 ގައި ހިމެނިފައިވާއިރު، ރެއާލް މެޑްރިޑް ވަނީ އެއްވަނައިގައި ހިފަހައްޓާފައެވެ.

އިއްޔެ ނިމިގެން ދިޔަ ޗެމްޕިއަންސް ލީގުގެ ފައިނަލްގައި ފުރަތަމަ ފަހަރަށް މުބާރާތުގެ ޗެމްޕިއަންކަން ހޯދި ޕެރިސް ސެއިންޓް ޖަރމަން (ޕީއެސްޖީ) ވަނީ ރޭންކިންގގެ ފަސްވަނައިގައި ހިމެނިފައެވެ. އަދި ފައިނަލްގައި ބަލިވި އިންޓަރ މިލާން ވަނީ ހަވަނައިގައެވެ.

އިންޓަރ މިލާނަކީ ފާއިތުވި ތިން ސީޒަންތެރޭގައި ދެ ފަހަރު ޗެމްޕިއަންސް ލީގުގެ ފައިނަލަށް ގޮސްފައިވާ ޓީމެކެވެ. އިންޓަރ މިލާން ވަނީ ފައިނަލްގައި ޕީއެސްޖީ އާ ވާދަކޮށް ބަލިވެފައެވެ.

ސްޕެއިންގެ ކްލަބްތަކަށް ބަލާއިރު، 2024/25 ވަނަ އަހަރުގެ މުބާރާތުގައި ކުއާޓަރ ފައިނަލުން ބަލިވިނަމަވެސް، ރެއާލް މެޑްރިޑް ދަނީ ރޭންކިންގގެ އެއްވަނައިގައި ހިފަހައްޓައިގެންނެވެ. އަދި ބާސެލޯނާ ވަނީ 10 ވަނަ ހޯދާފައެވެ.

ޔޫއެފާގެ ކްލަބް ރޭންކިންގ ސިސްޓަމް، ނުވަތަ ކްލަބް ކޮއެފިޝަންޓް އަކީ، ފާއިތުވި 5 މޫސުމުގައި ޔޫއެފާ ޗެމްޕިއަންސް ލީގް، ޔޫރަޕާ ލީގް އަދި ޔޫރަޕާ ކޮންފަރެންސް ލީގްގައި ކްލަބްތަކުގެ ޕަރފޯމަންސްއަށް ބަލައި ދަރަޖަކުރާ ނިޒާމެކެވެ. ކުލަބުތަކަށް ޕޮއިންޓް ދީފައިވަނީ ފާއިތުވެދިޔަ 5 އަހަރުގެ ޔޫރަޕުގައި ކުޅެފައިވާ މެޗުތަކަށް ޕޮއިންޓް ދީގެންނެވެ.

މި ރޭންކިންގތަކުގެ ސަބަބުން މުބާރާތްތަކުގެ ސީޑިންގ، އެންޓްރީ ބުރުތައް އަދި އާމްދަނީ ބެހުމަށް އަސަރުކުރެއެވެ.ޔުއޭފާ ރޭންކިންގ ގަދަ 10 އެއް